مکہ اور مدینہ کی مسجدوں میں نماز پڑھنے کی فضیلت کے بیان میں
اسحاق بن منصور، عیسیٰ بن منذر، محمد بن حرب، حضرت ابوسلمہ ؓ بن عبدالرحمن اور حضرت ابوعبداللہ اغر (حضرت ابوہریرہ ؓ کے ساتھیوں میں سے ہیں) سے روایت ہے کہ انہوں نے حضرت ابوہریرہ ؓ سے سنا وہ فرماتے ہیں کہ رسول اللہ ﷺ کی مسجد میں نماز پڑھنا مسجد حرام کے علاوہ باقی تمام مساجد میں ایک ہزار نمازیں پڑھنے سے زیادہ فضیلت رکھتا ہے کیونکہ رسول اللہ ﷺ تمام انبیاء (علیہم السلام) میں آخری نبی ﷺ ہیں اور آپ ﷺ کی مسجد آخری مسجد ہے۔ حضرت ابوسلمہ اور حضرت ابوعبداللہ کہتے ہیں کہ ہم اس میں کوئی شک نہیں کرتے کہ حضرت ابوہریرہ ؓ نے یہ بات رسول اللہ ﷺ کی حدیث کی حیثیت سے فرمائی تھی اور ہم اس حدیث کے بارے میں حضرت ابوہریرہ ؓ سے یقینی طور پر معلوم نہ کرسکے یہاں کہ جب حضرت ابوہریرہ ؓ وفات پاگئے تو ہم اس کو یاد کرنے لگے اور افسوس کرنے لگے کہ اس حدیث کے بارے میں ہم حضرت ابوہریرہ ؓ سے بات نہیں کرسکے اگر ہم بات کرلیتے تو حضرت ابوہریرہ ؓ ہمیں رسول اللہ ﷺ سے یہ حدیث نقل کر کے سنا دیتے ہم اس سلسلہ میں یہ بات کر رہے تھے کہ حضرت عبداللہ بن ابراہیم بن قارظ ہمارے ساتھ آکر بیٹھ گئے تو ہم نے اس حدیث کے بارے میں ان سے ذکر کیا جو ہم نے حضرت ابوہریرہ ؓ سے معلوم کرنی تھی تو حضرت عبداللہ بن ابراہیم بن قارظ نے ہم سے فرمایا کہ میں گواہی دیتا ہوں کہ میں نے حضرت ابوہریرہ ؓ سے سنا وہ فرماتے تھے کہ رسول اللہ ﷺ نے فرمایا کہ میں انبیاء (علیہم السلام) میں آخری نبی ہوں اور میری مسجد مساجد میں آخری مسجد ہے۔