عبداللہ بن عباس کی مرویات
حضرت ابن عباس ؓ کہتے ہیں کہ میں اور حضرت خالد بن ولید ؓ ایک مرتبہ نبی ﷺ کی خدمت میں حاضر ہوئے، اس وقت نبی ﷺ حضرت میمونہ ؓ کے یہاں موجود تھے، حضرت میمونہ ؓ نے فرمایا کہ کیا ہم آپ کو وہ کھانا نہ کھلائیں جو ہمیں ام عفیق نے ہدیہ کے طور پر بھیجا ہے، انہوں نے کہا کیوں نہیں، چناچہ ہمارے سامنے دو بھنی ہوئی گوہ لائی گئیں، نبی ﷺ نے انہیں دیکھ کر ایک طرف تھوک پھینکا، حضرت خالد بن ولید ؓ کہنے لگے کہ شاید آپ اسے ناپسند فرماتے ہیں؟ نبی ﷺ نے فرمایا ہاں! پھر حضرت میمونہ ؓ نے فرمایا کہ کیا میں آپ کے سامنے وہ دودھ پیش نہ کروں جو ہمارے پاس ہدیہ کے طور پر آیا ہے؟ نبی صلی اللہ علیہ وسل نے فرمایا کیوں نہیں، چناچہ دودھ کا ایک برتن لایا گیا، نبی ﷺ نے اسے نوش فرمایا: میں نبی ﷺ کی دائیں جانب تھا اور حضرت خالد بن ولید ؓ بائیں جانب، نبی ﷺ نے فرمایا پینے کا حق تو تمہارا ہے، لیکن اگر تم چاہو تو حضرت خالد ؓ کو اپنے اوپر ترجیح دے لو؟ میں نے عرض کیا کہ میں آپ کے پس خوردہ پر کسی کو ترجیح نہیں دے سکتا۔ پھر نبی ﷺ نے فرمایا جس شخص کو اللہ کھانا کھلائے، وہ یہ دعا کرے کہ اے اللہ! ہمارے لئے اس میں برکت عطاء فرما اور اس سے بہترین کھلا اور جس شخص کو اللہ دودھ پلائے، وہ یہ دعا کرے کہ اللہ! ہمارے لئے اس میں برکت عطاء فرما اور اس میں مزید اضافہ فرما، کیونکہ کھانے اور پینے دونوں کی کفایت دودھ کے علاوہ کوئی چیز نہیں کرسکتی۔ گذشتہ حدیث اس دوسری سند سے بھی مروی ہے