حضرت عبداللہ بن عمر ؓ کی مرویات
عبیداللہ بن عبداللہ کہتے ہیں کہ ایک مرتبہ میں حضرت عائشہ صدیقہ ؓ کی خدمت میں حاضر ہوا اور عرض کیا کہ آپ مجھے نبی کریم ﷺ کے مرض الوفات کے بارے کچھ بتائیں گی؟ فرمایا کیوں نہیں، نبی کریم ﷺ کی طبیعت جب بوجھل ہوئی تو آپ ﷺ نے پوچھا کیا لوگ نماز پڑھ چکے؟ ہم نے کہا نہیں یا رسول اللہ! وہ آپ کا انتظار کر رہے ہیں نبی کریم ﷺ نے فرمایا میرے لئے ایک ٹب میں پانی رکھو، ہم نے ایسے ہی کیا، نبی کریم ﷺ نے غسل کیا اور جانے کے لئے کھڑے ہونے ہی لگے تھے کہ آپ ﷺ پر بےہوشی طاری ہوگئی جب افاقہ ہوا تو پھر یہی سوال پوچھا کہ کیا لوگ نماز پڑھ چکے؟ ہم نے حسب سابق وہی جواب دیا اور تین مرتبہ اسی طرح ہوا۔ حضرت عائشہ ؓ کہتی ہیں کہ لوگ نماز عشاء کے لئے مسجد میں بیٹھے نبی کریم ﷺ کا انتظار کر رہے تھے نبی کریم ﷺ نے حضرت صدیق اکبر ؓ کے پاس یہ پیغام بھیجا کہ آپ لوگوں کو نماز پڑھادیں حضرت ابوبکر ؓ بڑے رقیق القلب آدمی تھے کہنے لگے اے عمر! آپ لوگوں کو نماز پڑھا دیں انہوں نے کہا اس کے حقدار تو آپ ہی ہیں چناچہ ان دونوں میں حضرت صدیق اکبر ؓ لوگوں کو نماز پڑھاتے رہے ایک دن نبی کریم ﷺ کو اپنے مرض میں کچھ تخفیف محسوس ہوئی تو آپ ﷺ ظہر کی نماز کے وقت دو آدمیوں کے درمیان نکلے جن میں سے ایک حضرت عباس ؓ تھے حضرت ابوبکر ؓ نے جب نبی کریم ﷺ کو دیکھا تو پیچھے ہٹنے لگے نبی کریم ﷺ نے انہیں اشارہ کیا کہ پیچھے نہ ہٹیں اور اپنے ساتھ آنے والے دونوں صاحبوں کو حکم دیا تو انہوں نے نبی کریم ﷺ کو حضرت صدیق اکبر ؓ کے پہلو میں بٹھادیا حضرت ابوبکر صدیق ؓ کھڑے ہو کر نماز پڑھتے رہے اور نبی کریم ﷺ بیٹھ کر نماز پڑھنے لگے۔ عبیداللہ کہتے ہیں کہ اس حدیث کی سماعت کے بعد ایک مرتبہ میں حضرت ابن عباس ؓ کے یہاں آیا ہوا تھا میں نے ان سے کہا کہ کیا میں آپ کے سامنے وہ حدیث پیش کروں جو نبی کریم ﷺ کے مرض والوفات کے حوالے سے حضرت عائشہ ؓ نے مجھے سنائی ہے؟ انہوں نے کہا ضرور بیان کرو چناچہ میں نے ان سے ساری حدیث بیان کردی انہوں نے اس کے کسی حصے پر نکیر نہیں فرمائی البتہ اتنا ضرور پوچھا کہ کیا حضرت عائشہ ؓ نے آپ کو اس آدمی کا نام بتایا جو حضرت عباس ؓ کے ساتھ تھا؟ میں نے کہا نہیں، انہوں نے فرمایا کہ وہ حضرت علی ؓ تھے اللہ کی رحمتیں ان پر نازل ہوں۔