حضرت عبداللہ بن عمر ؓ کی مرویات
سالم کہتے ہیں کہ حج تمتع کے سلسلے میں حضرت ابن عمر ؓ وہی رخصت دیتے تھے جو اللہ نے قرآن میں نازل کی ہے اور نبی کریم ﷺ کی سنت سے ثابت ہے کچھ لوگ ان سے کہتے ہیں کہ آپ کے والد صاحب تو اس سے منع کرتے تھے آپ ان کی مخالفت کیوں کرتے ہیں؟ وہ انہیں جواب دیتے کہ تم اللہ سے نہیں ڈرتے؟ اگر حضرت عمر ؓ نے اس سے روکا تھا تو ان کے پیش نظر بھی خیر تھی کہ لوگ اتمام عمرہ کریں جب اللہ نے اسے حلال قرار دیا ہے اور نبی کریم ﷺ نے اس پر عمل کیا ہے تو تم اسے خود پر حرام کیوں کرتے ہو؟ کیا نبی کریم ﷺ کی سنت کی پیروی کرنا زیادہ بہتر ہے یا حضرت عمر ؓ کی؟ حضرت عمر ؓ نے تم سے یہ نہیں کہا تھا کہ اشہر حج میں عمرہ کرنا ہی حرام ہے انہوں نے صرف یہ کہا تھا کہ عمرہ کا اتمام یہ ہے کہ تم اشہر حج کے علاوہ کسی اور مہینے میں الگ سے اس کے لئے سفر کر کے آؤ۔