حضرت ابوسعید خدری ؓ کی مرویات
حضرت ابوسعید خدری ؓ سے مروی ہے کہ ایک مرتبہ ہم لوگ بیٹھے ہوئے نبی ﷺ کا انتظار کر رہے تھے کہ نبی ﷺ اپنی کسی اہلیہ محترمہ کے گھر سے تشریف لے آئے، ہم نبی ﷺ کے ساتھ چل پڑے، راستے میں نبی ﷺ کی جوتی ٹوٹ گئی، حضرت علی ؓ رک کر جوتی سینے لگے اور نبی ﷺ آگے چل پڑے، ہم بھی چلتے رہے، ایک جگہ پہنچ کر نبی ﷺ کھڑے ہوگئے اور حضرت علی ؓ کا انتظار کرنے لگے، ہم بھی کھڑے ہوگئے اسی دوران نبی ﷺ نے فرمایا تم میں ایک آدمی ایسا بھی ہوگا جو قرآن کریم کی تاویل و تفسیر پر اسی طرح قتال کرے گا جیسے میں نے اس کی تنزیل پر قتال کیا ہے، یہ سن کر ہم جھانک جھانک کر دیکھنے لگے، اس وقت ہمارے درمیان حضرت ابوبکر و عمر ؓ بھی موجود تھے، لیکن نبی ﷺ نے فرمایا وہ جوتی سینے والا ہے، اس پر ہم حضرت علی ؓ کو یہ خوشخبری سنانے کے لئے گیئے تو ایسا محسوس ہوا کہ جیسے انہوں نے بھی یہ بات سن لی ہے۔