حضرت زبیربن عوام ؓ کی مرویات
سفیان بن وہب خولانی (رح) کہتے ہیں کہ جب ہم نے ملک مصر کو بزور شمشیر فتح کرلیا تو حضرت زبیر ؓ نے حضرت عمرو بن العاص ؓ سے جو فاتح مصر اور لشکر اسلام کے سپہ سالار تھے، کہا کہ اے عمرو بن العاص! اسے تقسیم کر دیجئے، انہوں نے کہا میں تو اسے ابھی تقسیم نہیں کروں گا، حضرت زبیر ؓ نے قسم کھا کر فرمایا کہ آپ کو یہ اسی طرح تقسیم کرنا پڑے گا جیسے نبی ﷺ نے خیبر کو تقسیم فرمایا تھا، انہوں نے کہا کہ امیرالمومنین سے خط و کتابت کرنے سے قبل میں اسے تقسیم نہیں کرسکتا، چناچہ انہوں نے حضرت عمر ؓ کی خدمت میں اس نوعیت کا ایک عریضہ لکھ بھیجا، وہاں سے جواب آیا کہ ابھی اسے برقرار رکھو (جوں کا توں رہنے دو ) یہاں تک کہ اگلی نسل جنگ میں شریک ہوجائے۔