Tafseer-e-Baghwi

وَشَدَدْنَا : اور ہم نے مضبوط کی مُلْكَهٗ : اس کی بادشاہت وَاٰتَيْنٰهُ : اور ہم نے اس کو دی الْحِكْمَةَ : حکمت وَفَصْلَ : اور فیصلہ کن الْخِطَابِ : خطاب

اور ہم نے ان کی بادشاہی کو مستحکم کیا اور ان کو حکمت عطا کی اور (خصومت کی) بات کا فیصلہ (سکھایا)

حضرت داؤد (علیہ السلام) کی حکومت 20، وشددنا ملکہ، یعنی ہم نے ان کی حکومت کو مضبوط متحکم بنادیا۔ حضرت ابن عباس ؓ کا قول ہے کہ اللہ نے تمام بادشاہوں سے بڑھ کر حضرت داؤد علیہ کو اقتدار عطا فرمایا تھا، ان کے قلعہ کی نگرانی ہر رات 36 ہزار سپاہی کرتے تھے۔ بروایت عکرمہ حضرت ابن عباس ؓ کا یہ قول نقل کیا ہے کہ بنی اسرائیل میں سے کسی آدمی نے کسی بڑے آدمی پر حضرت داؤد (علیہ السلام) کے سامنے یہ دعوی کیا کہ اس نے میری گائیں چھین لی ہیں۔ حضرت داؤد (علیہ السلام) نے مدعی علیہ السلا سے پوچھا اس نے انکار کردیا۔ آپ نے مدعی سے گواہ طلب کیے ، اس کے پاس گواہ نہ تھے۔ آپ نے فرمایا، چلے جاؤ، میں تمہارے معاملے میں غور کرکے فیصلہ کروں گا۔ اللہ تعالیٰ نے خواب میں حضرت داؤد (علیہ السلام) کے پاس وحی بھیجی کہ مدعی علیہ کو قتل کردیا جائے۔ بیدارہونے کے بعد آپ نے خیال کیا کہ یہ ایک خواب ہے، میں فیصلہ میں جلدی نہیں کروں گا۔ دوسرے روز پھر یہی خواب آیا لیکن آپ نے خواب کی تعمیل نہیں کی۔ تیسرے روز خواب میں وحی آئی کہ مدعی علیہ کو قتل کردو، سخت سزادو۔ بیدارہونے کے بعد حضرت داؤد (علیہ السلام) نے مدعی علیہ کو طلب کیا اور فرمایا ، اللہ نے میرے پاس وحی بھیجی ہے کہ میں تجھے قتل کرادوں۔ اس نے کہا کیا آپ بغیر ثبوت کے مجھے قتل کرادیں گے۔ حضرت داؤد (علیہ السلام) نے فرمایا، ہاں اللہ کی قسم ! میں تیرے معاملہ میں اللہ کا حکم نافذکرکے رہوں گا۔ جب اس شخص نے دیکھا کہ حضرت داؤد (علیہ السلام) مجھے قتل کرادیں گے توبولا آپ عجلت سے کام نہ لیں، میں آپ کو اصل واقعہ بتائے دیتا ہوں میرے لیے اس جرم کی یہ سزا تجویز نہیں کی گئی ہے بلکہ یہ میری پکڑ ایک اور جرم میں ہوئی ہے ، میںنی اس مدعی کے باپ کو دھوکادے کر اچانک قتل کردیا تھا ، اس کی مجھے یہ سزادی گئی ہے۔ حضرت داؤد (علیہ السلام) نے اس کو قتل کرنے کا حکم دے دیا اور قتل کرادیا۔ اس واقعہ سے بنی اسرائیل کے دلوں پر حضرت داؤد (علیہ السلام) کی ہیبت چھاگئی اور آپ کی حکومت بڑی مستحکم ہوگئی ۔ ، واتیناہ الحکمۃ، اس سے مراد نبوت اور تمام امور میں پہنچ جانا۔ ، وفصل الخطاب ، اس سے مراد کلام کو واضح بیان کرنا۔ فصل الخطاب کی تفسیر ابن مسعودؓ ، حسن کلبی مقاتل کے نزدیک ، فصل الخطاب، سے مراد ہے بصیرت فیصلہ۔ حضرت ابن عباس ؓ نے فرمایا واضح کلام مراد ہے ۔ حضرت علی ؓ کا قول نقل کیا کہ ، فصل الخطاب البینۃ علی المدعی والیمین علی من انکر، ہے ۔ مدعی پر لازم ہے کہ گواہ پیش کرے اور گواہ نہ ہوں تو مدعی علیہ سے حلف لیا جائے۔ یہ ضابطہ تمام جھگڑوں کو طے کردیتا ہے۔ فریقین کی بات ہی ختم ہوجاتی ہے۔ حضرت ابی بن کعب کے قول کی بھی یہی روایت آتی ہے ۔ حضرت ابی نے فرمایا، فصل الخطاب ، گواہ اور قسم ہے ۔ مجاہد، عطاء بن رباح کا یہی قول ہے۔ شعبی کا قول ہے کہ حمد وثناء کے بعد جب آدمی مقصد بیان کرنا چاہتا ہے اور بیان مقصد سے پہلے امابعد کہتا ہے تو یہ فصل الخطاب ہے۔ سب سے پہلے حضرت داؤد (علیہ السلام) نے یہ کہا تھا۔

Top