تفسیر درِ منثور

34۔ عبد بن حمید وابن ابی الدنیا فی کتاب الاہوال وابن جریر وابن المنذر وابن ابی حاتم کئی طرق سے ابن عباس ؓ سے روایت کیا کہ ” لاوزر “ سے مراد ہے کہ کوئی قلعہ اور پناہ کی جگہ نہیں اور ایک روایت میں ہے کہ کوئی محفوظ جگہ نہیں اور ایک روایت میں ہے کہ کوئی پہاڑ نہیں۔ 35۔ الطستی نے حضرت ابن عباس ؓ سے روایت کیا کہ نافع بن ارزق (رح) نے ان سے پوچھا کہ مجھے اللہ تعالیٰ کے اس قول آیت لا وزر کے بارے میں بتائیے۔ تو انہوں نے فرمایا کہ الوزر سے مراد ہے پناہ کی جگہ۔ پھر پوچھا کیا عرب کے لوگ اس معنی سے واقف ہیں ؟ فرمایا ہاں کیا تو نے عمرو بن کلثوم کو نہیں سنا۔ کہ وہ کہتا ہے لعمرک ما ان لہ صخرۃ لعمرک ما ان لہ من وزر۔ ترجمہ : تیری عمر کی قسم ! اس کے لیے کوئی چٹان نہیں تیری عمر کی قسم ! اس کے لیے کوئی پناہ گاہ نہیں ہے۔ 36۔ عبد بن حمید وابن ابی الدنیا فی الاہوال وابن المنذر وابن ابی حاتم نے ابن مسعود رضی عنہ سے روایت کیا کہ لا وزر سے مراد ہے کوئی قلعہ نہیں۔ 37۔ عبد بن حمید نے سعید بن جبیر، عطیہ اور ابوقلابہ رحمہم اللہ سے اسی طرح روایت کیا۔ 38۔ عبد بن حمید نے حسن (رح) سے روایت کیا کہ آیت کلا لا وزر سے مراد ہے کہ عرب کے لوگوں کو جب کوئی سخت معاملہ پیش آجاتا تو یوں کہتے الوزر الوزر جب اللہ تعالیٰ نے دین اسلام بھیجا تو فرمایا کلا لاوزر یعنی کوئی پہاڑ نہیں۔ 39۔ ابن جریر وابن المنذر نے حسن (رح) سے روایت کیا کہ ایک آدمی جب اپنے جانوروں میں ہوتا تھا اور اچانک اس کے پاس گھوڑا آجاتا تو اس کا مالک اسے کہتا تھا الوزر الوزیر یعنی پہاڑ کا قصد کر اور وہاں محفوظ ہوجا۔ 40۔ عبد بن حمید وابن جریر نے مجاہد (رح) سے روایت کیا کہ لا وزر سے مراد ہے کوئی پہاڑ نہیں۔ 41۔ عبد بن حمید نے ابو قلابہ (رح) سے روایت کیا کہ آیت لا وزر سے مراد ہے کوئی غار نہیں اور نہ کوئی پناہ کی جگہ۔ 42۔ عبد بن حمید نے ابو قلابہ (رح) سے روایت کیا کہ آیت لا وزر سے مراد ہے کہ کوئی بچانے والا پہاڑ نہیں۔ 43۔ ابن جریر نے ضحاک (رح) سے روایت کیا کہ آیت لا وزر یعنی کوئی پہاڑ نہیں حمیر قبیلہ کی لغت میں۔ 44۔ عبد بن حمید وابن جریر نے مطرف (رح) سے روایت کیا کہ آیت لاوزر سے مراد ہے کوئی پہاڑ نہیں 45۔ عبد بن حمید وابن جریر نے قتادہ (رح) سے روایت کیا کہ آیت لا وزر سے مراد ہے کہ نہیں ہے کوئی پہاڑ اور نہیں کوئی محفوظ پناہ گاہ اور نہیں ہے کوئی پناہ کی جگہ اور نہ کوئی نجات دلانے والا آیت الی ربک یومئذ المستقر اس دن آپ کے رب کی طرف ٹھکانہ ہے۔ یعنی آج کے دن تیرے رب کی طرف ہی انتہا ہے۔ آیت ینبؤ الانسان یومئذ بما قدم واخر۔ اس دن انسان کو بتادیا جائے گا کہ وہ کیا لایا۔ یعنی جو کچھ اس نے اللہ تعالیٰ کی اطاعت میں آگے بھیجا ” واخر “ اور کیا چھوڑ آیا یعنی جو اس نے اللہ کے حق میں سے ضائع کیا۔