تفسیر درِ منثور

26۔ ابن المنذر نے ابن عباس ؓ سے روایت کیا کہ آیت قلوب یومئذ واجفۃ کئی دل اس دن دھڑک رہے ہوں گے یعنی در رہے ہوں گے اور مضطرب ہوں گے۔ 27۔ عبدالرزاق وعبد بن حمید نے قتادہ (رح) سے آیت قلوب یومئذ واجفۃ کے بارے میں روایت کیا کہ اس دن کئی دل خوف زدہ ہوں گے۔ 28۔ عبد بن حمید وابن المنذر نے مجاہد (رح) سے روایت کیا کہ آیت قلوب یومئذ واجفۃ یعنی خوف زدہ آیتء انا لمردودون فی الحافرۃ۔ کیا ہم پہلی حالت میں لوٹائے جائیں گے۔ یعنی کیا ہم زمین میں نئی پیدائش کے ساتھ جائیں گے۔ آیت ءاذا کنا عظاما نخرۃ کیا جب ہم بوسیدہ ہڈیاں ہوجائیں گے۔ جبکہ ہم بوسیدہ ہڈیاں ہوچکے ہوں گے۔ 29۔ عبد بن حمید وابن المنذر نے قتادہ (رح) سے روایت کیا کہ آیت قلوب یومئذ واجفہ یعنی ڈر جائیں گے ان چیزوں سے جو وہ دیکھیں گے آیت یومئذ ابصارہا خاشعۃ اس دن ان کی آنکھیں جھکی ہوئی ہوں گی۔ یعنی ذلیل ہوں گی۔ آیت یقولونء انا لمردودون فی الحافرۃ۔ یعنی کیا ہم نئی پیدائش میں اٹھیں جب ہم مرجائیں۔ دوبارہ اٹھنے کو جھٹلاتے ہوئے آیت ءاذا کنا عظاما نخرہ۔ یعنی جب کہ ہم بوسیدہ ہڈیاں ہوچکے ہوں گے۔