تفسیر درِ منثور

12۔ عبد بن حمید نے مجاہد رحمہا للہ سے اسی طرح روایت کیا۔ 13۔ ابن المنذر نے ابن عباس ؓ سے روایت کیا کہ آیت والقت ما فیہا یعنی سونے کے کنگن (باہر ڈال دے گی) ۔ 14۔ الفریابی وعبد بن حمید والحاکم وصححہ والبیہقی نے الدلائل میں عبداللہ بن عمرو ؓ سے روایت کیا کہ بیت اللہ زمین سے دو ہزار سال پہلے موجود تھا۔ اس لیے اللہ تعالیٰ نے فرمایا آیت واذا الارض مدت۔ یعنی زمین بیت اللہ کے نیچے سے پھیلائی گئی مکمل طور پر۔ 15۔ الحاکم نے ابن عمرو ؓ سے روایت کیا کہ جب قیامت کا دن ہوگا زمین کو چمڑے کی طرح پھیلا دیا جائے گا اور اللہ تعالیٰ ساری مخلوق انسان، جن، چوپائے اور جنگلی جانور سب کو اٹھائیں گے۔ جب وہی دن ہوگا تو اللہ تعالیٰ جانوروں کے درمیان قصاص کو قائم فرمائیں گے۔ یہاں تک کہ اللہ تعالیٰ سینگ والی بکری سے بغیر سینگ والی بکری کے لیے بدلہ لیں گے۔ اس کی ٹکر کی وجہ سے جب اللہ تعالیٰ جانورون کے درمیان قصاص سے فارغ ہوجائیں گے۔ تو ان سے فرمائیں گے تم مٹی ہوجاؤ تو سب ختم ہوجائیں گے جب کافر اس کو دیکھے گا تو کہے گا آیت یلیتنی کنت ترٰبا (النباء آیت 40) اے کاش میں مٹی ہوگیا ہوتا۔ 16۔ الحاکم نے سند جید کے ساتھ جابر ؓ سے روایت کیا کہ نبی اکرم ﷺ نے فرمایا قیامت کے دن زمین کو چمڑے کی طرح پھیلادیا جائے گا پھر ابن آدم کے لیے اس میں سے اپنے قدم رکھنے کی جگہ کے علاوہ کوئی جگہ نہ ہوگی۔ 17۔ ابو القاسم الختلی نے الدیباج میں ابن عمر ؓ سے روایت کیا کہ نبی مکرم ﷺ نے اللہ تعالیٰ کے اس قول آیت اذا السماء انشقت کے بارے میں فرمایا کہ میں سب سے پہلا آدمی ہوں گا کہ جس سے قیامت کے دن سب سے پہلے زمین پھٹے گی۔ اور میں اپنی قبر میں سیدھا بیٹھ جاؤں گا اور میرے ساتھ زمین حرکت کرے گی۔ میں اس سے کہوں گا تجھے کیا ہوا وہ کہے گی میرے رب نے مجھے حکم فرمایا ہے کہ جو کچھ میرے اندر ہے میں اس کو باہر نکال دوں۔ اور میں خالی ہوجاؤں پھر اس طرح ہوجاؤں جیسے پہلے تھی کہ کوئی چیز میرے اندر نہ تھی۔ اسی کو اللہ تعالیٰ نے فرمایا آیت والقت ما فیہا وتخلت۔ 18۔ عبدالرزاق وعبد بن حمید نے قتادہ (رح) سے روایت کیا کہ آیت واذنت لربہا وحقت سے مراد ہے اس نے رب کا فرمان سنا اور اطاعت کی آیت والقت ما فیہا وتخلت یعنی وہ نکال دے گی اپنے بوجھو کو اور جو کچھ اس میں ہے خزانوں میں سے اور لوگوں میں سے جو مدفون ہیں۔ اور فرمایا آیت یا ایہا الانسان انک کا دح الی ربک کدحا۔ اے انسان تو اپنے رب کے پاس پہنچتے تک کام میں کوشش کر رہا ہے۔ یعنی تو اس کے لیے مسلسل اور سخت کوشش کرتا ہے۔