تفسیر درِ منثور

Dure-Mansoor · 87. Al-A'laa · Ayah 16

Tafseer
  1. بَلْ تُؤْثِرُوْنَ الْحَیٰوةَ الدُّنْیَا٘ۖ﴿16﴾

    1. بَلْبلکہ
    2. تُؤْثِرُوْنَبڑھاتے ہو (ترجیح)
    3. الْحَيٰوةَزندگی
    4. الدُّنْيَادنیا
Translation · Dure-Mansoor
بلکہ تم لوگ دنیا والی زندگی کو ترجیح دیتے ہو
Tafseer · Dure-Mansoor
74۔ عبد بن حمید نے ابن مسعود ؓ عہ سے روایت کیا کہ وہ اس طرح پڑھتے تھے۔ آیت بل تو ثرون الحیوۃ الدنیا والاخرۃ بلکہ تم دنیا کی زندگی تو آخرت پر ترجیح دیتے ہو۔ آخرت کو دنیا پر ترجیح دینی چاہیے 75۔ ابن جریر وابن المنذر والطبرانی والبیہقی نے شعب الایمان میں عرفجہ الثقفی (رح) سے روایت کیا کہ میں نے ابن مسعود ؓ سے سورة سبح اسم ربک الاعلیٰ ۔ پڑھی۔ جب وہ اس آیت بل تو ثرون الحیوۃ الدنیا پر پہنچے۔ تو قراءت چھوڑدی اور اپنے ساتھیوں کی طرف متوجہ ہو کر فرمایا۔ ہم نے دنیا کو آخرت پر ترجیح دی تو قوم چپ ہوگئی پھر فرمایا ہم نے دنیا کو ترجیح دی کیو کہ ہم نے دیکھا اس کی زینت کو اور اس کی عورتوں کو اس کے کھانے کو اور اس کے پینے کو اور آخرت ہم سے پوشیدہ اور مخفی ہے تو ہم نے اس دنیا کو اختیار کرلیا ہے اور ہم نے آخرت کو چھوڑدیا ہے اور فرمایا بل تو ثرون یاء کے ساتھ۔ 76۔ عبد بن حمید وابن جریر وابن ابی حاتم نے قتادہ (رح) سے روایت کیا کہ آیت بل تو ثرون الحیوۃ الدنیا سے مراد ہے کہ لوگوں نے دنیا کو اختیار کرلیا سوائے ان کے جن کو اللہ تعالیٰ محفوظ رکھا آیت والاخرۃ خیر۔ اور آخرت خیر میں آیت وابقی اور باقی رہنے والی ہے یعنی باقی رہنے میں اس سے کہیں بہتر ہے۔ 77۔ عبد بن حمید وابن المنذر وابن ابی حاتم نے عکرمہ (رح) سے آیت بل تو ثرو الحیوۃ الدنیا کے بارے میں روایت کیا کہ اس آیت میں مراد یہ امت ہے۔ بیشک تم دنیا کی زندگی کو ترجیح دو گے۔ 78۔ البیہقی نے شعب الایمان میں انس ؓ سے روایت کیا کہ رسول اللہ ﷺ نے فرمایا لا الہ الا اللہ کی ناراضگی سے بندوں کو روکتا ہے جب تک وہ اپنی دنیوی معاملات کو اپنے دین پر ترجیح نہ دینے لگیں۔ جب وہ اپنی دنیا کو ترجیح دیں گے۔ پھر کہیں لا الہ الا اللہ تو اسے ان پر لوٹا دیا جاتا ہے اور اللہ تعالیٰ فرماتے ہیں کہ تم نے جھوٹ بولا۔ 79۔ البیہقی نے ابن عمر ؓ سے روایت کیا کہ نبی اکرم ﷺ نے فرمایا جو کوئی لا الہ الا اللہ وحدہ لا شریک لہ کی شہادت کے ساتھ اللہ تعالیٰ سے ملاقات کرے گا تو وہ جنت میں داخل ہوگا۔ جب تک اس کے ساتھ کسی غیر کو شریک نہ کرے۔ آپ نے اس کو تین مرتبہ فرمایا دور سے آنے والے لوگوں میں سے کسی نے کہا آپ پر میرے ماں باپ قربان ہوں یا رسول اللہ ! کون سی چیز کوئی اس کے ساتھ شریک کرسکتا ہے۔ فرمایا دنیا محبت اور دنیا کو ترجیح دینا اور دنیا کے لیے جمع ہونا اور دنیا کے ساتھ راضی رہنا۔ اور ظلم اور جبر کرنے والوں کا عمل کرنا۔ 80۔ احمد نے ابو موسیٰ اشعری ؓ سے روایت کیا کہ رسول اللہ ﷺ نے فرمایا جس شخص نے اپنی دنیا سے محبت کی اس نے اپنی آخرت کو نقصان پہنچایا۔ اور جس شخص نے اپنی آخرت سے محبت کی اس نے اپنی دنیا کو نقصان پہنچایا سو تم اس چیز کو ترجیح دو تو باقی رہنے والی ہے اس چیز پر جو فنا ہونے والی ہے۔ 81۔ احمد نے عائشہ ؓ سے روایت کیا کہ رسول اللہ ﷺ نے فرمایا دنیا اس کا گھر ہے جس کا کوئی گھر نہ ہو اور اس کا مال ہے جس کے لیے کوئی مال نہیں اور اس کو ہی جمع کرتا ہے جس کو عقل نہ ہو یعنی جو بےعقل ہو۔ 82۔ ابن ابی الدنیا والبیہقی نے موسیٰ بن یسار (رح) سے روایت کیا کہ ان کو یہ بات پہنچی ہے کہ نبی اکرم ﷺ نے فرمایا کہ اللہ جل شانہ نے کوئی مخلوق دنیا سے بڑھ کر زیادہ ناپسندیدہ پیدا نہیں فرمائی۔ 83۔ ابن ابی شیبہ نے ابو الاحوص (رح) سے روایت کیا کہ آیت قد افلح من تزکی سے مراد ہے جس نے تھوڑا سا مال دیا۔ بیشک وہ فلاح پا گیا۔