تفسیر درِ منثور

Dure-Mansoor · 89. Al-Fajr · Ayah 28

Tafseer
  1. ارْجِعِیْۤ اِلٰى رَبِّكِ رَاضِیَةً مَّرْضِیَّةًۚ﴿28﴾

    1. ارْجِعِيْٓلوٹ چل
    2. اِلٰى رَبِّكِاپنے رب کی طرف
    3. رَاضِيَةًراضی
    4. مَّرْضِيَّةًوہ تجھ سے راضی
Translation · Dure-Mansoor
لوٹ جا اپنے رب کی طرف اس حال میں کہ تو خوش ہو اور تجھ سے بھی اللہ تعالیٰ خوش ہو
Tafseer · Dure-Mansoor
57۔ ابن ابی حاتم نے سعید بن جبیر (رح) سے روایت کیا کہ عرش کی جڑ سے ایک وادی بہے گی تو اس میں سب چوپائے زمین کی سطح پر ظاہر ہوجائیں گے۔ پھر روحیں اڑیں گی اور ان کو حکم دیا جائے گا کہ جسموں میں داخل ہوجاؤ یہی اللہ تعالیٰ کا قول ہے آیت ارجعی الی ربک راضیۃ مرضیہ اپنے رب کی طرف لوٹ جا تو اس سے راضی وہ تجھ سے راضی۔ 58۔ ابن ابی حاتم نے ابن عباس ؓ سے اللہ تعالیٰ کے اس قول آیت ارجعی الی ربک راضیۃ مرضیۃ کے بارے میں روایت کیا کہ تو اپنے رب کی طرف لوٹ آ، پس اجر وثواب پر خوش ہوتے ہوئے جو تجھے عطا کیا گیا۔ مرضیہ اس حال میں کہ اللہ تعالیٰ بھی تیرے عمل سے راضی اور خوش ہے۔ آیت فادخلی فی عبادی پس میرے بندوں میں شامل ہو۔ یعنی ایمان والوں میں۔ نفس مطمئنہ کا ذکر 59۔ ابن ابی حاتم نے حسن (رح) سے اللہ تعالیٰ کے اس قول آیت یا ایتہا النفس المطئنہ کے بارے میں روایت کیا بیشک اللہ تعالیٰ جب اپنے مومن بندے کی روح کو قبض کرنے کا ارادہ فرماتے ہیں تو وہ روح اس کی طرف جانے سے مطمئن ہوتی ہے اور اللہ تعالیٰ بھی اس سے مطمئن ہوتے ہیں اور وہ روح اللہ تعالیٰ سے راضی ہوجاتی ہے۔ اور اللہ تعالیٰ بھی اس سے راضی ہوجاتے ہیں۔ پھر اللہ تعالیٰ اس کے قبض کرنے کا حکم فرماتے ہیں، اور اس کو جنت میں داخل فرماتے ہیں اور اس کو اپنے نیک بندوں میں شامل کردیتے ہیں۔ 60۔ ابن جریر وابن المنذر وابن ابی حاتم نے ابو صالح (رح) سے اللہ تعالیٰ کے اس قول آیت ارجعی الی ربک کے بارے میں روایت کیا کہ یہ ندا موت کے وقت ہوگی کیونکہ اس وقت اس کا اپنے رب کی طرف رجوع اور دنیا سے خروج ہوتا ہے جب قیامت کا دن ہوگا تو اس سے کہا جائے گا آیت فادخلی فی عبادی وادخلی جنتی۔ پس میرے بندو میں شامل ہوگا اور میری جنت میں داخل ہوگا۔ 61۔ طبرانی وابن عساکر نے ابو امامہ ؓ سے روایت کیا کہ رسول اللہ ﷺ نے ایک آدمی سے فرمایا اس طرح دعا مانگ اللہم انی اسئلک نفسا مطمئنۃ تو من بلقائک وترضی بقضائک وتقنع بعطائک اے اللہ بیشک میں آپ سے سوال کرتا ہوں نفس مطمئنہ کا اور میں ایمان رکھتا ہوں تیری ملاقات پر اور راضی ہوں تیرے فیصلے پر اور قناعت کرنے والا ہوں تیری عطا پر۔ 62۔ فریابی وعبد بن حمید نے مجاہد (رح) سے آیت النفس المطمئنۃ کے بارے میں روایت کیا کہ اس سے مراد ہے عاجزی اور انکساری کرنے والا اللہ کے لیے۔ 63۔ عبدالرزاق وابن جریر نے قتادہ اور حسن رحمہما اللہ سے روایت کیا کہ آیت یا ایتہا النفس المطمئنۃ سے مراد ایسا نفس ہے جو اس کی تصدیق کرنے والا ہو جو کچھ اللہ تعالیٰ نے فرمایا۔ 64۔ عبد بن حمید وابن جریر وابن ابی حاتم نے قتادہ (رح) سے روایت کیا کہ آیت یا ایتہا النفس المطمئنہ سے ایسا مومن مراد ہے جو اس پر مطمئن ہے جو اللہ تعالیٰ نے وعدہ فرمایا آیت فادخلی فی عبادی یعنی نیک بندوں میں داخل ہوجا اور میری جنت میں داخل ہوجا۔ 65۔ عبد بن حمید نے ضحاک (رح) سے روایت کیا کہ آیت ارجع الی ربک یعنی لوٹ جا اپنے جسم کی طرف۔ 66۔ ابن المنذر نے محمد بن کعب قرظی (رح) سے اس آیت کے بارے میں روایت کیا کہ مومن جب مرتا ہے تو اپنی منزل کو جنت میں دیکھتا ہے۔ اور اللہ تبارک وتعالیٰ فرماتے ہیں آیت یا ایتہا النفس المطمئنۃ ارجعی۔ یعنی اے نفس مطمئنہ تو اپنے جسم کی طرف لوٹ آ۔ جس سے تو نکلا ہے۔ راضیہ یعنی میرے اس ثواب پر راضی ہوتے ہوئے جو تو نے دیکھ لیا ہے۔ یہاں تک کہ منکر نکیر تجھ سے سوال کرن لگیں۔ 67۔ ابن ابی حاتم نے سدی (رح) سے روایت کیا کہ آیت فادخلی فی عبادی سے مراد ہے تو میرے بندوں کے ساتھ داخل ہوجا۔ 68۔ ابن المنذر وابن ابی حاتم نے زید بن اسلم ؓ سے آیت یا ایتہا النفس المطمئنۃ کے بارے میں روایت کیا کہ اس میں اس کے لیے موت کے وقت جنت کی بشار یہ اور دوبارہ زندہ ہونے کے وقت بھی اور میدان قیامت میں جمع ہونے کے دن بھی۔ 69۔ ابن ابی حاتم والطبرانی نے سعید بن جبیر (رح) سے روایت کیا کہ ابن عباس ؓ نے طائف میں وفات پائی۔ ایک پرندہ آیا اور اس طرح کا کوئی پرندہ کسی آنکھ نے نہیں دیکھا تھا۔ اور وہ پرندہ ان کی لاش میں داخل ہوگیا۔ پھر اس کو نکلتے ہوئے نہیں دیکھا گیا۔ جب ان کو دفن کیا گیا تو ان کی قبر کے کنارے پر یہ آیت تلات کی گئی اور کسی نے نہیں جانا کہ کس نے اس آیت کو تلاوت کیا اور وہ یہ آیت تھی آیت یا ایتہا النفس المطمئنۃ۔ ارجعی الی ربک راضیۃ مرضیہ فادخلی فی عبادی۔ وادخلی جنتی۔ اے اطمینان والی روح اپنے رب کی طرف لوٹ چل تو اس سے راضی وہ تجھ سے راضی پس میرے بندوں میں شامل ہوجا اور میری جنت میں داخل ہوجا۔
Dure-Mansoor - 89 : 28