تفسیرِ مظہری

بل رفعہ اللہ الیہ بلکہ اللہ نے ان کو اپنی طرف اٹھا لیا اس جملہ میں عیسیٰ کے قتل کی تردید اور آپ کے اٹھائے جانے کا اثبات ہے۔ وکان اللہ عزیزا اور اللہ ہے زبردست۔ یہودیوں کو سزا دینے پر قادر۔ اس کو اس کے ارادہ سے کوئی نہیں روک سکتا۔ حکیما حکمت والا کہ یہودیوں پر لعنت و غضب نازل فرمایا اور صطیونس بن استسیانوس کو ان پر مسلط کیا جس نے ان کی قوم کا عظیم الشان قتل کیا یا حکیم ہونے سے یہ مراد ہے کہ اللہ نے حضرت عیسیٰ ( علیہ السلام) کے معاملہ میں جو تدبیر کی وہ پُر حکمت تھی۔