تدبرِ قرآن

وَلَا تَــقُوْلُوْا لِمَا تَصِفُ اَلْسِنَتُكُمُ الْكَذِبَ ھٰذَا حَلٰلٌ وَّھٰذَا حَرَامٌ لِّتَفْتَرُوْا عَلَي اللّٰهِ الْكَذِبَ ۭ اِنَّ الَّذِيْنَ يَفْتَرُوْنَ عَلَي اللّٰهِ الْكَذِبَ لَا يُفْلِحُوْنَ یعنی حلال و حرام کرنے کا حق صرف اللہ ہی کو ہے کسی دوسرے کو یہ حق نہیں ہے کہ وہ بغیر کسی خدائی سند کے محض اپنے مزعومات کی بنیاد پر کسی چیز کو حلال اور کسی چیز کو حرام قرار دینا شروع کردے یہ اللہ پر جھوٹا افترا ہے کیونکہ جو بات اس نے نہیں فرمائی وہ تم اس کی طرف منسوب کرتے ہو اور یاد رکھو خدا پر جھوٹا افترا کرنے والے کبھی کامیاب نہیں ہوں گے۔ لِمَا تَصِفُ اَلْسِنَتُكُمُ الْكَذِبَ۔ یعنی جن کے باب میں محض تمہاری اپنی زبان کے جھوٹے اور بےبنیاد دعوے ہیں ان کے حق میں تمہارے پاس خدا کی طرف سے کوئی دلیل نہیں ہے۔ لِّتَفْتَرُوْا عَلَي اللّٰهِ الْكَذِبَ ۭ۔ یعنی اپنے جی سے حلال و حرام قرار دینا کوئی معمولی بات نہیں ہے بالآخر یہ بات خدا پر جھوٹے افترا تک منتہی ہوتی ہے جو شدید ترین جرائم میں سے ہے۔