Tafseer-al-Kitaab - An-Noor : 19
اِنَّ الَّذِیْنَ یُحِبُّوْنَ اَنْ تَشِیْعَ الْفَاحِشَةُ فِی الَّذِیْنَ اٰمَنُوْا لَهُمْ عَذَابٌ اَلِیْمٌ١ۙ فِی الدُّنْیَا وَ الْاٰخِرَةِ١ؕ وَ اللّٰهُ یَعْلَمُ وَ اَنْتُمْ لَا تَعْلَمُوْنَ
اِنَّ : بیشک الَّذِيْنَ : جو لوگ يُحِبُّوْنَ : پسند کرتے ہیں اَنْ : کہ تَشِيْعَ : پھیلے الْفَاحِشَةُ : بےحیائی فِي الَّذِيْنَ : میں جو اٰمَنُوْا : ایمان لائے (مومن) لَهُمْ : ان کے لیے عَذَابٌ : عذاب اَلِيْمٌ : دردناک فِي الدُّنْيَا : دنیا میں وَالْاٰخِرَةِ : اور آخرت میں وَاللّٰهُ : اور اللہ يَعْلَمُ : جانتا ہے وَاَنْتُمْ : اور تم لَا تَعْلَمُوْنَ : تم نہیں جانتے
جو لوگ چاہتے ہیں کہ مسلمانوں میں فحش پھیلے ان کے لئے دنیا میں دردناک عذاب ہے اور آخرت میں (بھی) ۔ اللہ جانتا ہے اور تم نہیں جانتے۔
[18] یعنی دنیا میں بھی سزا کے مستحق ہیں اور آخرت میں بھی۔ اگرچہ موقع و محل کے لحاظ سے اس آیت کا مفہوم یہ ہے کہ جو لوگ بدکاری کے جھوٹے الزام گھڑ کر انھیں معاشرے میں پھیلانے کی کوششیں کرتے ہیں وہ سزا کے مستحق ہیں لیکن آیت کے الفاظ اشاعت فحش کی تمام صورتوں پر حاوی ہیں لہذا ایک اسلامی حکومت کا فرض ہے کہ اشاعت فحش کے تمام ذرائع کا سدباب کرے اور مناسب تعزیری قوانین کے ذریعے اشاعت فحش کا ارتکاب کرنے والوں کو عبرت انگیز سزا دے۔ [91] یعنی تم لوگ نہیں جانتے کہ فحش پھیلانے کے اثرات معاشرے میں کہاں کہاں تک پہنچتے ہیں اور مجموعی طور پر ان کا نقصان کس قدر ملت کو اٹھانا پڑتا ہے۔ اس چیز کو اللہ ہی خوب جانتا ہے۔
Top