Tafseer-e-Baghwi

48 ۔” واصبر لحکم ربک “ یہاں تک کہ ان پر وہ عذاب واقع ہو جس کا ہم نے ان پر فیصلہ کیا ہے۔ ” فانک باعیننا “ یعنی ہماری نگاہ میں ہے۔ ابن عباس ؓ فرماتے ہیں جو وہ آپ کے ساتھ معاملہ کرتے ہیں ہم دیکھ رہے ہیں اور زجاج (رح) فرماتے ہیں اس کا معنی ہے کہ آپ (علیہ السلام) اس حیثیت پر ہیں کہ ہم آپ کو دیکھتے ہیں اور آپ (علیہ السلام) کی حفاظت کریں گے۔ پس وہ آپ (علیہ السلام) کو ناپسند چیز نہ پہنچا سکیں گے۔ ” وسبح بحمد ربک حین تقوم “ سعیدبن جبیر (رح) اور عطاء (رح) فرماتے ہیں یعنی جب آپ (علیہ السلام) مجلس سے کھڑے ہوں تو یہ کہیں ” سبحانک اللھم وبحمدک “ پس اگر مجلس خیر کی ہوگی تو نیکیاں زیادہ ہوجائیں گی اور اگر اس کے علاوہ ہوگی تو یہ اس کے لئے کفارہ ہوگا۔ حضرت ابوہریرہ ؓ سے روایت ہے کہ وہ رسول اللہ ﷺ نے فرمایا جو کسی مجلس میں بیٹھا۔ پس اس میں اس کا شور زیادہ ہوجائے تو وہ کھڑا ہونے سے پہلے یہ کہہ لے ” سبحانک اللھم وبحمدک اشھدان لاالہ الا انت، استغفرک واتوب الیک “ تو وہ اس کا کفارہ ہوجائے گا اور ابن عباس ؓ فرماتے ہیں اس کا معنی ہے اللہ تعالیٰ کے لئے نماز پڑھیں جب آپ (علیہ السلام) اپنی جگہ سے کھڑے ہوں۔ ضحاک اور ربیع رحمہما اللہ فرماتے ہیں جب تو نماز کی طرف کھڑا ہو تو ” سبحانک اللھم وبحمدک و تبارک اسمک وتعالیٰ جدک والا الہ غیرک “ کہہ۔ حضرت عائشہ صدیقہ ؓ سے روایت ہے فرماتی ہیں کہ رسول اللہ ﷺ جب نماز شروع کرتے تو کہتے ” سبحانک اللھم وبحمدک و تبارک اسمک وتعالیٰ جدک وال الہ غیرک “ اور کلبی (رح) فرماتے ہیں وہ اللہ کا ذکر زبان کے ساتھ کرتا ہے جب آپ بستر سے کھڑے ہوں یہاں تک کہ وہ نماز میں داخل ہوجائیں۔ عاصم بن حمید سے روایت ہے کہ انہوں نے پوچھا حضرت عائشہ صدیقہ ؓ سے کہ رسول اللہ ﷺ کس چیز کے ساتھ رات کے قیام (تہجد) کو شروع کرتے ؟ انہوں نے فرمایا جب کھڑے ہوتے تو دس مرتبہ تکبیر کہتے اور اللہ کی حمد کرتے دس مرتبہ اور اللہ کی تسبیح کرتے دس مرتبہ لا الہ الا اللہ کہتے دس مرتبہ اور استغفار کرتے دس مرتبہ اور کہتے ” اللھم اغفرلی واھدنی وارزقنی وعافنی “ اور قیامت کے دن تنگ جگہ سے پناہ مانگتے۔

Top