Kashf-ur-Rahman

اِنْ اَحْسَنْتُمْ اَحْسَنْتُمْ لِاَنْفُسِكُمْ١۫ وَ اِنْ اَسَاْتُمْ فَلَهَا١ؕ فَاِذَا جَآءَ وَعْدُ الْاٰخِرَةِ لِیَسُوْٓءٗا وُجُوْهَكُمْ وَ لِیَدْخُلُوا الْمَسْجِدَ كَمَا دَخَلُوْهُ اَوَّلَ مَرَّةٍ وَّ لِیُتَبِّرُوْا مَا عَلَوْا تَتْبِیْرًا

اِنْ : اگر اَحْسَنْتُمْ : تم نے بھلائی کی اَحْسَنْتُمْ : تم نے بھلائی کی لِاَنْفُسِكُمْ : اپنی جانوں کے لیے وَاِنْ : اور اگر اَسَاْتُمْ : تم نے برائی کی فَلَهَا : تو ان کے لیے فَاِذَا : پھر جب جَآءَ : آیا وَعْدُ الْاٰخِرَةِ : دوسرا وعدہ لِيَسُوْٓءٗا : کہ وہ بگاڑ دیں وُجُوْهَكُمْ : تمہاری چہرے وَلِيَدْخُلُوا : اور وہ گھس جائیں گے الْمَسْجِدَ : مسجد كَمَا : جیسے دَخَلُوْهُ : وہ گھسے اس میں اَوَّلَ مَرَّةٍ : پہلی بار وَّلِيُتَبِّرُوْا : اور برباد کر ڈالیں مَا عَلَوْا : جہاں غلبہ پائیں وہ تَتْبِيْرًا : پوری طرح برباد

اگر تم اچھے عمل کرو گے تو اس کا فائدہ تمہارے ہی لئے ہوگا اور اگر تم بڑے کام کرو گے تو بھی اپنے اسی لئے کرو گے پھر جب دوسری بار کا وقت آیا تو ہم نے دوسرے بندے بھیجے تاکہ وہ تمہارے چہرے بگاڑ دیں اور جس طرح پہلی مرتبہ کے حملہ آور مسجد میں گھس گئے تھے اسی طرح یہ بھی مسجد میں گھس پڑیں اور نیز اس لئے اس لئے کہ جس چیز پر وہ حملہ آور قابو پالیں اس کو بالکل برباد کر ڈالیں

-7 اگر تم نے اچھے کام اور نیک کام کئے تو اپنے ہی بھلے کے لئے اور ان اعمال کا فائدہ تم ہی کو پہنچے گا اور اگر تم نے برے کام کئیتو بھی اپنے ہی لئے کرو گے اور دین و دنیا میں ان اعمال کی سزا بھگتو گے پھر جب دوسری بار کا وقت آیا یعنی بنی اسرائیل نے مکرر فساد کیا اور شریعت موسوی کی مخالفت کی تو ہم نے دوسرے بندوں کو تم پر غلبہ دے دیا اور تم پر مسلط کردیا تاکہ وہ تم کو مار مار کر تمہارے چہرے بگاڑ دیں اور جس طرح پہلی مرتبہ کے حملہ آور لوگ مسجد میں گھس گئے تھے اسی طرح یہ پچھلے بھی مسجد یعنی بیت المقدس میں گھس جائیں نیز اس لئے کہ جس چیز پر یہ حملہ آور قابو پالیں اس کو بالکل برباد کر ڈالیں اور تہیس نہیس کردیں۔ یعنی تم نے دوبارہ شرارت کی تو اب کی دفعہ دوسرے لوگوں نے تم کو اسی طرح لوٹا اور مارا اور تمہاری مسجد کی بےحرمتی کی جس طرح پہلے بندوں نے لوٹا اور مارا تھا اور قتل و غارت گری کی تھی اور بیت المقدس کی توہین کا ارتکاب کیا تھا اور جس طرح پہلوں نے شہروں میں پھیل کر اور گھروں میں گھس کر ہر قابو یافتہ چیز کو تباہ اور برباد کر ڈالا تھا۔ اسی طرح ان دوسرے چڑھائی کرنے والوں نے بھی کیا کہتے ہیں کہ یہ دوسرا حملہ آور طیطس رومی تھا۔ (واللہ اعلم)

Top