Mafhoom-ul-Quran

یہ سب قدرت والے اللہ کی باتیں ہیں تشریح : کون بیوقوف ہوگا جو اللہ کی اتنی طاقت قدرت اور عظمت کو دیکھ کر بھی اس کے موجود ہونے اور واحد ہونے پر یقین نہ کرے گا ؟ پہلے بھی بڑے بیوقوف اس طرح کے گزر چکے ہیں موجودہ زمانے میں بھی ہیں اور بعد کے زمانے میں بھی ہوتے رہیں گے۔ حیرت اس بات پر ہے کہ اس قدر ترقی کر گئے کہ چاند تک پہنچ جانے کا دعویٰ کرتے ہیں مگر کہتے یہ ہیں کہ ہمیں اللہ کہیں دکھائی نہیں دیا۔ حالانکہ غور کریں اپنی پیدائش پر کس حیرت انگیز طریقہ سے انسان اور تمام مخلوقات کے جوڑے بنائے گئے پھر ان کے آپس کے ملاپ سے دنیا بھرتی چلی گئی۔ آبادی کا توازن کائنات کا نظام اور شعریٰ ستارہ جس کی کفار پوجا کرتے ہیں۔ غرض ہر ہر چیز خود بتا رہی ہے کہ ہمارا خالق بڑے کمال کا مالک ہے۔ اس جیسی کاریگری کوئی دکھانے کی ہرگز طاقت اور قدرت نہیں رکھتا۔ پھر جب کوئی شک و شبہ کی بات باقی نہیں رہ گئی تو پھر جھک جاؤ۔ ' سو اللہ کے لیے سجدہ کرو اور اس کی بندگی کرو۔ 62 توحید کی اہمیت یوں بتائی جاسکتی ہے کہ قرآن پاک میں اس مضمون کو بار بار بیان کیا گیا ہے۔ 1 ۔ ' لَا اِلٰہَ اِلَّا اللّٰہ ' ترجمہ اللہ کے سوا کوئی بھی الہ نہیں 12 مرتبہ آیا ہے۔ 2 ۔ ' لَا اِلٰہَ اِلَّا ھُو ' ترجمہ اللہ کے سوا کوئی بھی معبود نہیں 30 مرتبہ آیا ہے۔ 3 ۔ ' لَا اِلٰہَ اِلَّا اَنَا ' ترجمہ میرے سوا کوئی الہ نہیں 3 مرتبہ آیا ہے۔ 4 ۔ ' اِلٰھُکُمْ اِلٰہٌ وَّاحِد ' ترجمہ تم سب کا معبود ایک ہی ہے یہ آیت 6 مرتبہ آئی ہے۔ 5 ۔ ' اِنَّمَا اللّٰہُ اِلٰہٌ وَاحِد ' ترجمہ بیشک اللہ ہی واحد معبود ہے۔ دراصل یہ عقیدہ توحید خود انسان کی زندگی کے لیے بہت اہمیت رکھتا ہے۔ یہی عقیدہ ہے جو انسانی زندگی کو بہترین ترتیب دیکر اس کو بلندیوں کی طرف لے جاتا ہے۔ خلاصہ سورة النجم قرآن کے مرکزی مضمون پر پوری سورت دی گئی ہے۔ یعنی توحید قرآن ' رسول ﷺ ' فرشتے جنت ' دوزخ ' آخرت حساب کا دن اور مومن و مشرک کا مقابلہ۔ پھر انسان کی زندگی اس کا انجام۔ دین اسلام کی برکات اور کفروشرک کے نقصانات۔ اور پھر مثال کے لیے یعنی عبرت دلانے کے لیے گزشتہ قوموں کا ذکر بھی کیا گیا ہے۔ غرض الہ العٰلمین ہی مالک و مختار ہے۔ جب چاہے گا سب کچھ ختم کرکے دوسری دنیا بنا دے گا جو ہمیشہ کی دنیا ہوگی۔ اور ہم بھی ہمیشہ ہمیشہ کے لیے اس نئی دنیا میں زندہ رہیں گے اللہ ہمیں اپنے غضب سے بچائے اور اپنی رحمتیں ہم پر برسائے آمین۔ جگ میں آکر ادھر ادھر دیکھا تو ہی آیا نظر جدھر دیکھا خواجہ میر درد الحمدللہ سورة النجم مکمل ہوئی۔

Top