Mazhar-ul-Quran

یٰۤاَیُّهَا الَّذِیْنَ اٰمَنُوْۤا اٰمِنُوْا بِاللّٰهِ وَ رَسُوْلِهٖ وَ الْكِتٰبِ الَّذِیْ نَزَّلَ عَلٰى رَسُوْلِهٖ وَ الْكِتٰبِ الَّذِیْۤ اَنْزَلَ مِنْ قَبْلُ١ؕ وَ مَنْ یَّكْفُرْ بِاللّٰهِ وَ مَلٰٓئِكَتِهٖ وَ كُتُبِهٖ وَ رُسُلِهٖ وَ الْیَوْمِ الْاٰخِرِ فَقَدْ ضَلَّ ضَلٰلًۢا بَعِیْدًا

يٰٓاَيُّھَا : اے الَّذِيْنَ اٰمَنُوْٓا : جو لوگ ایمان لائے (ایمان والو) اٰمِنُوْا : ایمان لاؤ بِاللّٰهِ : اللہ پر وَرَسُوْلِهٖ : اور اس کا رسول وَالْكِتٰبِ : اور کتاب الَّذِيْ نَزَّلَ : جو اس نے نازل کی عَلٰي رَسُوْلِهٖ : اپنے رسول پر وَالْكِتٰبِ : اور کتاب الَّذِيْٓ اَنْزَلَ : جو اس نے نازل کی مِنْ قَبْلُ : اس سے قبل وَمَنْ : اور جو يَّكْفُرْ : انکار کرے بِاللّٰهِ : اللہ کا وَمَلٰٓئِكَتِهٖ : اور اس کے فرشتوں وَكُتُبِهٖ : اور اس کی کتابوں وَرُسُلِهٖ : اسکے رسولوں وَالْيَوْمِ : اور روز الْاٰخِرِ : آخرت فَقَدْ ضَلَّ : تو وہ بھٹک گیا ضَلٰلًۢا : گمراہی بَعِيْدًا : دور

اے مسلمانو ! ایمان لاؤ خدا پر اور اس کے رسول پر اور اس کتاب پر جو اس نے اپنے رسول پر اتاری ہے اور اس کتاب پر جو نازل کی اس سے پہلے اور جو کوئی منکر ہو وے اللہ سے اور اس کے فرشتوں سے اور اس کی کتابوں سے اور اس کے رسولوں سے اور قیامت کے دن سے پس تحقیق وہ ضرور دور کی گمراہی میں پڑا

منافقوں کا ذکر اس آیت کا مطلب یہ ہے، ایمان پر ثابت رہو اے ایمان والو ! یہ خطاب مسلمانوں سے ہوا۔ رسول سے مراد آنحضرت ﷺ اور کتاب سے مراد قرآن پاک ہے۔ شان نزول : حضرت ابن عباس ؓ نے فرمایا یہ آیت حضرت عبد اللہ بن سلام ؓ وغیرہ کے حق میں نازل ہوئی یہ لوگ مومنین اہل کتاب میں سے تھے۔ آنحضرت ﷺ کی خدمت میں حاضر ہوئے اور عرض کیا ہم آپ پر اور آپ کی کتاب پر اور حضرت موسیٰ (علیہ السلام) پر اور توریت پر اور حضرت عزیر (علیہ السلام) پر ایمان لاتے ہیں اور اس کے سوا باقی کتابوں اور رسولوں پر ایمان نہ لائیں گے۔ حضرت رسول ﷺ نے ان سے فرمایا کہ تم اللہ پر اور اس کے رسول محمد مصطفیٰ ﷺ پر اور قرآن پر اور اس سے پہلی ہر کتاب پر ایمان لاؤ۔ اس پر یہ آیت نازل ہوئی۔ حاصل مطلب یہ ہے کہ ان میں سے کسی ایک کا بھی انکار نہ کرے۔ جس کے یہ معنی ہیں کہ ایک رسول یا ایک کتاب کا انکار بھی سب کا انکار ہے، اگر دل سے ان سب پر ایمان نہ لائے تو خدا کے نزدیک مسلمان نہیں۔

Top