تفسیر القرطبی

Al-Qurtubi · 100. Al-Aadiyaat · Ayah 8

  1. وَ اِنَّهٗ لِحُبِّ الْخَیْرِ لَشَدِیْدٌؕ﴿8﴾

    1. وَاِنَّهٗاور بیشک وہ
    2. لِحُبِّمحبت میں
    3. الْخَيْرِمال و دولت
    4. لَشَدِيْدٌالبتہ سخت
Translation · Al-Qurtubi
وہ تو مال کی سخت محبت کرنے والا ہے
Tafseer · Al-Qurtubi

اور بلاشبہ وہ مال کی محبت میں بڑا سخت ہے۔

انہ کی ضمیر سے مراد انسان ہے اس میں کوئی اختلاف نہیں۔ خیر سے مراد مال ہے اس معنی میں اللہ تعالیٰ کا فرمان ہے : ان ترک خیرا (البقرہ) ہے اگر وہ مال چھوڑے۔ عدی نے کہا :

ماذا ترجی النفوس من طلب۔۔۔ الخیر وحب الحیاۃ کاربھا

نفوس مال کی طلب سے کس چیز کی امید رکھتے ہیں جب کہ زندگی کی محبت ان پر بہت شدید ہے۔

وہ مال کی محبت میں بہت ہی قوی ہے۔ ایک قول یہ کیا گیا ہے : لشدید سے مراد بخیل ہے بخیل کو شدید اور متشدد کہتے ہیں۔ طرفہ نے کہا :

اری الموت یعتام الکرام و یصطفی۔۔۔ عقیلۃ مال الفاحش المتشدد

میں موت کو دیکھتا ہوں وہ معزز ترین کو پسند کرتی ہے اور بخیل کو عمدہ مال کو منتخب کرتی ہے۔

یہ جملہ بولا جاتا ہے اعتامہ واعتماہ یعنی اسے پسند کرلیا، چن لیا۔ فاحش کا معنی بخیل ہے اس معنی میں اللہ تعالیٰ کا فرمان ہے : ویامرکم بالفحشاء (البقرہ) وہ تمہیں بخل کا حکم دیتا ہے۔ ابن زید نے کہا : اللہ تعلای نے مال کو خیر کہا ہے ممکن ہے وہ شر اور حرام ہو لیکن لوگ اسے خیر کہتے ہیں اسی وجہ سے اللہ تعالیٰ نے اسے خیر کہا ہے اور جہاد کو سوء قرار دیا ہے، فرمایا : فانقلبوا بنعمۃ من اللہ وفضل لم یمسسھم سوء (آل عمران) وہ اللہ تعالیٰ کی نعمت اور فضل سے پلٹے، انہیں جہاد کا سامنا نہ کرنا پڑا۔ جہاد کو سوء کہنا یہ عام لوگوں کے نام رکھنے کے اعتبار سے ہے۔ فراء نے کہا : نظم آیت کا تقاضا تھا کہ یوں کلام ہوتی وانہ لشدید الحب للخیر جب حب کا ذکر پہلے ہوچکا تو فرمایا : شدید آخر سے حب کا ذکر حذف کردیا کیونکہ اس کا ذکر پہلے ہوچکا تھا اور آیات کے سروں کی رعایت کی وجہ سے بھی ایسا کیا، جس طرح اللہ تعالیٰ کا فرمان ہے : فی یوم عاصف۔ (ابراہیم)