تفسیر القرطبی

والسماء والطارق۔۔۔ تا۔۔۔۔ الثاقب۔ یہاں دو قسمیں ہیں السماء ایک قسم ہے اور الطارق دوسری قسم ہے الطارق سے مراد ستارہ ہے اللہ تعالیٰ نے وما ادراک ما الطارق، النجم الثاقب۔ میں اس کی وضاحت کی، اس میں اختلاف ہے ایک قول یہ کیا گیا ہے، یہ زحل ستارہ ہے یہ ایسا ستارہ ہے جو ساتویں آسمان میں ہوتا ہے، اس کا ذکر محمد بن حسن، نے اپنی تفسیر میں کیا ہے اور اس کے بارے میں کئی روایات ذکر کیں، اللہ تعالیٰ ہی اس کی صحت کے بارے میں زیادہ آگاہ ہے۔ ابن زید نے کہا، اس سے مراد ثریا ہے ان سے یہ بھی مروی ہے کہ اس سے مراد زحل ہے، یہ فراء کا قول ہے حضرت ابن عباس نے کہا، اس سے مراد جدی ہے، حضرت ابن عباس، حضرت علی شیر خدا اور فراء سے مروی ہے، کہ نجم ثاقب سے مراد ساتویں آسمان میں ایک ستارہ ہے اس ساتویں آسمان میں اس ستارے کے سوا کوئی ستارہ نہیں جب ستارے آسمان میں اپنی جگہ جگہ لے لیتے ہیں تو یہ ان کے ساتھ نیچے آتا ہے اور ان کے ساتھ ہوتا ہے پھر ساتویں آسمان کی طرف لوٹ جاتا ہے، یہ زحل ستارہ ہے، یہ نیچے آتا ہے تو طارق ہوتا ہے جب اوپر جاتا ہے تب زحل ہوتا ہے، فراء نے کہا، ثقب الطائر، جب پرندہ بلند ہو ابوطالح نے حضرت ابن عباس سے روایت نقل کی ہے کہ رسول اللہ ابوطالب کے پاس بیٹھے ہوئے تھے تو ایک ستارہ نیچے آیا اس نے زمین کو نور سے بھر دیا ابوطالب گھبرا گئے تو یہ آیت نازل ہوئی، والسماء والطارق۔ حضرت ابن عباس نے یہ بھی مروی ہے کہ قسم ہے آسمان کی اور اس کی جو اس میں داخل ہے حضرت ابن عباس اور عطا سے یہ مروی ہے کہ الثاقب سے مراد وہ ستارہ ہے جو شیاطین کو مارا جاتا ہے قتادہ نے کہا، یہ تمام ستاروں میں عام ہے کیونکہ اس کا طلوع رات کے وقت ہوتا ہے اور جو تیرے پاس رات کے وقت آئے وہ طارق ہے شاعر نے کہا : الم تریانی کلما جئت طارقا، وجدت بھاطیبا وان لم تطیب۔ کیا تم دونوں نے مجھے نہیں دیکھا میں جب بھی رات کے وقت اس کے پاس آیاتو اس کے ہاں خوشبو پائی گئی اگرچہ اس نے خوشبو نہیں لگائی تھی۔ طارق سے مراد ستارہ ہے یہ اسم جنس ہے اسے یہ نام اس لیے دیا گیا ہے کیونکہ یہ رات کے وقت ظاہر ہوتا ہے اس معنی میں حدیث ہے کہ نبی کریم نے اس چیز سے منع کیا کہ مسافر رات کے وقت گھرآئے تاکہ عورت اپنے بال صاف کرلے اور بالوں میں کنگھی کرلے، عرب ہر ایسے قاصد کو طارق کہتے ہیں جو رات کے وقت آتا ہے، یہ جملہ بولا جاتا ہے، طارق فلاں یہ اس وقت کہتے ہیں جب وہ رات کے وقت آئے اس کا باب یو چلتا ہے، طرق یطرق طروقھا فھوطارق۔ ابن رومی نے کہا : یاراقد اللیل مسروا باولہ، ان الحوادث قد یطرقن اسحارا۔ اے رات کے وقت سونے والے اس کے پہلے حصہ پر خوش ہونے والے بیشک حوادثات بعض اوقات سحری کے وقت آجاتے ہیں۔ لاتفرجن بلیل طالب الوہ، فرب آخر لیل اجج النارا۔ اس رات پر خوش نہ ہو جس کا پہلاحصہ اچھا ہو بعض راتوں کے آخر آگ کو بھڑکادیتے ہیں۔ صحاح میں طارق سے مراد ایساستارہ ہے جسے صبح کا ستارہ کہتے ہیں اسی معنی میں ہند کا شعر ہے۔ نحن بنات طارق نمشی علی النمارق، ہم اس کی بیٹیاں جو شرف میں ستارے کی مانند ہے اور ہم عمدہ قالینوں پر چلتی ہیں۔ ماوردی نے کہا : طرق کا اصل معنی کھٹکھٹانا ہے، اس معنی میں مطرقہ ہے، رات کے وقت آنے والے کو طارق کہتے ہیں کیونکہ جب وہ پہنچتا ہے تو اسے کھٹکھٹانے کی ضرورت پڑتی ہے ایک قوم نے یہ کہا یہ تو کبھی دن کے وقت بھی ہوتا ہے عرب کہتے ہیں، اتیتک الیوم طرقتین، میں تیرے پاس آج دو دفعہ آیا، اس معنی میں رسول اللہ کا ارشاد ہے، اعوذبک من شر طوارق اللیل والنھار الاطارقا یطرق بخیریارحمن۔ میں رات اور دن کے وقت آنے والوں کے شر سے تیری پناہ چاہتا ہوں مگر ایسے آنے والے سے جو بھلائی لائے اے رحمن، جریر نے طروق کے معنی کی وضاحت کرتے ہوئے کہا : طرقتک صائدۃ القلوب ولیس ذا، حین الزیارۃ فارجعی بسلام۔ دلوں کو شکار کرنے والی تیرے پاس آئی جبکہ وہ زیارت کے وقت نہیں تھا پس توسلامتی کے ساتھ لوٹ جا۔ ثاقب سے مراد روشن ہے، اس معنی میں شھاب ثاقب ہے، باب یوں چلایا جاتا ہے، ثقب یثقب ثقبا وثقابہ، جب وہ روشن ہوثقوبہ، اس کی روشنی، عرب کہتے ہیں، اثقب نارک، اپنی آگ روشن کرکے، شاعر نے کہا : اذاع بہ فی الناس حتی کا نہ، بعلیاء نار اوقدت بثقوب۔ وہ اس کے ذریعے لوگوں میں مشہور ہوگیا یہاں تک کہ گویا وہ بلند جگہ پر آگ ہے جسے لکڑیوں کے ساتھ روشن کیا گیا ہے، ثقوب سے مراد وہ باریک لکڑیاں ہیں جن کے ساتھ آگ روشن کی جاتی ہے مجاہد نے کہا، ثاقب سے مراد روشن ہے، قشیری نے کہا، عمومی رائے یہ ہے کہ طارق اور ثاقب اسم جنس ہے اس سے عمومی معنی مراد لیا جاتا ہے جس طرح ہم نے مجاہد سے ذکر کیا ہے۔ وما ادراک ما الطارق۔ مقسم بہ کی عظمت شان کو بیان کرنے کے لیے اسے ذکر کیا گیا ہے سفیان نے کہا : قرآن حکیم میں جہاں بھی وما ادراک کے الفاظ ہیں اللہ تعالیٰ نے اپنے محبوب کو اس بارے میں آگاہ کردیا اور جہاں بھی ومایدریک فرمایا، اس کے بارے میں آگاہ نہیں کیا۔