Ruh-ul-Quran - 2 : 119

اِنَّا : بیشک ہم اَرْسَلْنَاکَ : آپ کو بھیجا بِالْحَقِّ : حق کے ساتھ بَشِيرًا ۔ وَنَذِيرًا : خوشخبری دینے والا۔ ڈرانے والا وَلَا تُسْئَلُ : اور نہ آپ سے پوچھا جائے گا عَنْ : سے اَصْحَابِ : والے الْجَحِيمِ : دوزخ

ہم نے آپ کو حق کے ساتھ بھیجا ہے، خوشخبری سنانے والا اور ڈرانے والا بنا کر اور آپ سے اہل دوزخ کی بابت سوال نہیں کیا جائے گا

اِنَّا اَرْسَلْنٰـکَ بِالْحَقِّ بَشِیْرًا وَّنَذِیْرًا وَّلاَ تُسْئَلُ عَنْ اَصْحَابِ الْجَحِیْمِ ۔ (ہم نے آپ کو حق کے ساتھ بھیجا ہے، خوشخبری سنانے والا اور ڈرانے والا بنا کر اور آپ سے اہل دوزخ کی بابت سوال نہیں کیا جائے گا) (البقرۃ : 119) مخالفین سے کہا جارہا ہے کہ دنیا کو جس حق کی ضرورت ہے اور جو سچائی انسان کے اندر کی آواز ہے۔ جس پر قائم رہ کر انسان کو دنیوی اور اخروی کامیابی نصیب ہوسکتی ہے اور جس کی روشنی سے جہالت اور کفر کی تاریکیاں دور ہوسکتی ہیں۔ اور جس پر عمل کے نتیجے میں انسان کو آسودگی نصیب ہوسکتی ہے۔ وہ حق دے کر اللہ تعالیٰ نے اے پیغمبر آپ کو بھیج دیا ہے۔ آپ اللہ کے آخری نبی ہیں۔ اب قیامت تک کے لیے ہدایت آپ کی ذات سے وابستہ ہے۔ آپ پر ایمان اور آپ کی ہدایت پر عمل سے نوع انسانی کو فوزوفلاح مل سکتی ہے اور آپ پر ایمان نہ لانے کی صورت میں آپ کو یہ حق ہے کہ آپ انھیں جہنم کے عذاب سے ڈرائیں اور دنیوی ناکامیوں سے متنبہ کریں۔ حق آپ کی زبان سے بول رہا ہے، آپ کا ایک ایک بول اور ایک ایک فیصلہ دنیا کے لیے قانون بھی ہوگا اور نتیجہ خیز بھی۔ کیونکہ آپ کے بعد اب پروردگار کسی کی زبان سے انسانی بھلائی کے فیصلے نہیں کرے گا اور کوئی انسانوں کو تباہی سے بچنے کے لیے کوئی نیا راستہ نہیں بتاسکے گا۔ مخالفین کو آپ کی اس حیثیت کو سمجھنا چاہیے اور اس پر عمل کرنا چاہیے۔ لیکن اگر ان میں سے کچھ لوگ اس راستے پر چلنے سے گریزاں ہیں اور وہ شیطان کے رستے پر چلنے کے لیے اصرار کرتے ہیں، تو پھر اے پیغمبر ! آپ کو اس بات پر فکر مند نہیں ہونا چاہیے کہ یہ لوگ ایمان نہ لاکر جہنم کا ایندھن بنیں گے اور کہیں ایسا نہ ہو کہ قیامت کے دن آپ سے پوچھا جائے کہ آپ نے شائد ان کو دین کی دعوت دینے میں سستی کی۔ یہاں فرمایا جارہا ہے کہ آپ اس کا خیال بھی نہ کیجئے۔ وہ لوگ اپنے اعمال کی پاداش میں پکڑے جائیں گے۔ آپ سے اس بارے میں ہرگز باز پرس نہیں ہوگی۔

Top