Siraj-ul-Bayan - 16 : 115

اِنَّمَا حَرَّمَ عَلَیْكُمُ الْمَیْتَةَ وَ الدَّمَ وَ لَحْمَ الْخِنْزِیْرِ وَ مَاۤ اُهِلَّ لِغَیْرِ اللّٰهِ بِهٖ١ۚ فَمَنِ اضْطُرَّ غَیْرَ بَاغٍ وَّ لَا عَادٍ فَاِنَّ اللّٰهَ غَفُوْرٌ رَّحِیْمٌ

اِنَّمَا : اس کے سوا نہیں حَرَّمَ : حرام کیا عَلَيْكُمُ : تم پر الْمَيْتَةَ : مردار وَالدَّمَ : اور خون وَلَحْمَ : اور گوشت الْخِنْزِيْرِ : خنزیر وَمَآ : اور جس اُهِلَّ : پکارا جائے لِغَيْرِ اللّٰهِ : اللہ کے علاوہ بِهٖ : اس پر فَمَنِ : پس جو اضْطُرَّ : لاچار ہوا غَيْرَ بَاغٍ : نہ سرکشی کرنیوالا وَّ : اور لَا عَادٍ : نہ حد سے بڑھنے والا فَاِنَّ اللّٰهَ : تو بیشک اللہ غَفُوْرٌ : بخشنے والا رَّحِيْمٌ : نہایت مہربان

اللہ نے تو تم پر صرف مردار حرام کیا ہے اور خون ، اور سور کا گوشت ، اور جس پر غیر اللہ کا نام پکارا گیا ہو ، پھر جو نہ زور کرتا ہو ، اور نہ ہی زیادتی اور عاجز ہوگیا ، تو اللہ بخشنے والا مہربان ہے (ف 1) ۔

کون کون سی چیزیں حرام ہیں ؟ : (ف 1) قرآن حکیم ایک مکمل شریعت ہے اس میں توحید و تفرید کے معارف بھی ہیں ، اور ضروری آداب وعوائد بھی ، کامل نظام مذہب کے معنی ہی یہ ہیں کہ اس میں ضروریات انسانی کی ہر چیز موجود ہو ، چناچہ قرآن سب باتوں پر تفصیل کے ساتھ روشنی ڈالتا ہے ۔ کھانا پینا بھی چونکہ تہذیب انسانی کا ایک ضروری جزو ہے اس لئے قرآن اس کے متعلق بھی ضروری ہدایات سے مشرف کرتا ہے ، قرآن کہتا ہے پاکیزہ چیزیں بلا تکلف کھاؤ جن میں مضرت نہ ہو ، جو ناپاک نہ ہوں ، جن کو ذوق سلیم گوارا کرلے ، جن کے کھانے سے اخلاقی ومذہبی مضرتیں نہ پیدا ہوں ، اور جو چیزیں ان صفات سے عاری ہوں ، وہ غذا کے قابل نہیں وہ حرام ہیں ، اور وہ یہ ہیں ۔ 1۔ مردار ، اس کے کھانے سے خساست پیدا ہوتی ہے قلب مردہ ہوجاتا ہے ، زندہ قومیں اس کے کھانے سے پرہیز کرتی ہیں ، صحت کے لئے بھی مضر ہے ، پیٹ میں تعفن پیدا کرتا ہے ۔ 2۔ خون : یہ عہد وحشت کی یادگار ہے ، اس سے درندگی کے جذبات پیدا ہوتے ہیں ، دانتوں اور معدہ کے لئے سخت مضر ہے ، عرب خون کو رکھ لیتے تھے اور دہی کی طرح جم جانے پر کھاتے تھے ۔ 3۔ سور کا گوشت : یہ تشنج کے مرض کو پیدا کرتا ہے جدید تحقیقات کے مطابق اس کے کھانے سے فوری موت کے امکانات بڑھ جاتے ہیں ، چناچہ امریکہ میں اس کے خلاف بہت سے مضمون لکھے گئے ، یہ قوائے شہوت میں تحریک پیدا کرتا ہے ، اور اس کے کھانے والی قومیں بےغیرت ہوجاتی ہیں ان میں جنسی غیرت کا مادہ اٹھ جاتا ہے ، یہی وجہ ہے آج یورپ میں سب کچھ موجود ہے مگر غیرت عنقا ہے ، کیونکہ وہ کثرت سے سور کا گوشت کھاتے ہیں ، روحانی لحاظ سے یہ جرص وآز کے جذبات کو ابھارتا ہے ، 4۔ غیر اللہ کے نام کی چیز : اس سے نظام شرک کی تائید ہوتی ہے ، اسلام چونکہ توحید کا مذہب ہے ، اس لئے تمام ایسے ذرائع بند کردینا چاہتا ہے جن سے شرک کے پھیلنے کا احتمال ہو ، حل لغات : اھل : مشہور کیا جائے الا لا ل کے معنے مشہور کرنے کے ہیں کیونکہ ھا ، اور دو لام شہر کے معنوں کو متضن ہیں چاند کو بھی ہلال اس لئے کہتے ہیں کو جب وہ طلوع ہوتا ہے تو اس کی جانب انگلیاں اٹھتی ہیں ۔

Top