Urwatul-Wusqaa - 53 : 59

کیا تم کو اس بات پر تعجب ہے ؟ 59 ؎ کسی چیز پر متعجب ہونے کی ایک سے زیادہ صورتیں ہو سکتی ہیں اور ہوتی ہیں لیکن وہ تعجب جو بطور انکار کیا جاتا ہے اس جگہ وہی مراد ہے کہ قیامت اور آخرت کا نام سنتے ہی لوگ تعجب کرنا شروع کردیتے تھے کہ یہ کیسے ہوسکتا ہے کہ وہ ہڈیاں جو کھائی گئی ہوں اور وہ ذرات جو اڑا دیئے گئے ہیں اور جسم جس کو زمین کھا چکی ہو اور وہ دوبارہ زندہ ہوجائے۔ نہیں کوئی نہیں جو دوبارہ زندہ کرسکے اور کسی کو دوبارہ زندگی نہیں ملے گی اور کوئی قیامت و یا مت نہیں ہے۔ (بعث) کے معنی کسی چیز کو اٹھا کھڑا کرنے اور سامنے کرنے کے ہیں۔ (بعث) کی دو قسمیں ہیں ایک بشریٰ اور دوسری الٰہی۔ اگر اس کی نسبت فاعل انسان کی طرف ہو تو اس کو بشری کہیں گے جیسے ایک شخص کا کسی دوسرے شخص کو روانہ کرنا اور بھیجنا اور اگر اللہ تعالیٰ کی طرف ہے تو اس کو الٰہی کہا جائے گا جو اللہ تعالیٰ کی ذات سے خاص ہے دوسرا کوئی زندہ نہیں کرسکتا اگر کسی مخلوق کی طرف اس کی نسبت ہوئی تو اس کے معنی موت سے دوبارہ زندہ کرنا مراد نہیں ہوگا اگر یہ بات آپ نے یاد رکھی تو آپ اس حقیقت کو سمجھ لیں گے کہ مردوں کو دوبارہ زندہ کرنے کی نسبت غیر اللہ کی طرف اگر ہو تو اس کا مفہوم کیا ہوگا ؟ (بعث) کے معنی کیا ہوئے ؟ جی اٹھنا ‘ زندہ کرنا ‘ اٹھا کھڑا کرنا ‘ مگر قرائن اور متعلقات کے اعتبار سے اس کے معنی بدلتے رہتے ہیں۔ مثلاً اونٹ کے لئے (بعث) کا لفظ آئے گا تو معنی اونٹ کے اٹھانے اور چلانے کے ہوں گے۔ مردوں کے لئے استعمال ہوگا تو معنی جی اٹھنے اور حشر کے ہوں گے۔ رسولوں کے متعلق کہا جائے گا تو مبعوث کرنے اور بھینے کے ہوں گے۔ مختصر یہ کہ اس کے معنی حسب قرینہ و مقام سمجھنے چاہئیں۔ زیر نظر آیت میں (بعث) کا لفظ نہیں ہے لیکن چونکہ جس بات پر کفار مکہ کو تعجب تھا وہ بات قیامت کے آنے اور لوگوں کو دوبارہ زندہ کر کے حاضر کرنے ہی پر تھا اس لئے بعث کے لفظ کی بحث اس جگہ آگئی کہ ان سے پوچھا جا رہا ہے کہ کیا قیامت ہی ایک چیز یا ایسی بات ہے جس پر تم کو تعجب ہو رہا ہے ؟ آخر کیوں ؟ کیا تم کو پہلی بار جو زندگی ملی ہے اس پر تعجب نہیں ؟ پھر اگر اس پہلی زندگی پر تم کو تعجب نہیں تو دوسری پر کیوں ؟ کیا پہلی بار پیدا کرنا زیادہ مشکل ہے یا دوسری بار ایک بنی ہوئی چیز کے مطابق اس کو پھر بنا دینا زیادہ مشکل ہے ؟ تعجب تو تم پر ہے کہ جس بات پر تعجب کرنا چاہئے تھا اس پر تو تعجب کر نہیں رہے اور جو بات تعجب کرنے کی نہیں ہے اس پر تم کو تعجب ہے ؟

Top