تفسیر درِ منثور

احسان جتانے کی ممانعت 24۔ ابن المنذر نے حماد (رح) سے روایت کیا کہ میں نے ابی ؓ کے مصحف میں یوں پڑھا آیت ولا تمنن تستکثر۔ 25۔ عبد بن حمید وابن المنذر نے عکرمہ (رح) سے روایت کیا کہ آیت ولا تمنن تستکثر سے مراد ہے کہ آپ کسی کو کوئی چیز نہ دیں اس نیت سے تاکہ آپ کو اس سے زیادہ دیا جائے اور یہ آیت نبی مکرم ﷺ کے بارے میں نازل ہوئی۔ 26۔ عبد بن حمید نے ضحاک (رح) سے آیت ولا تمنن تستکثر کے بارے میں روایت کیا کہ آپ کوئی چیز نہ دیں اس نیت سے کہ آپ کو اس سے زیادہ دیا جائے۔ اور یہ حکم نبی مکرم ﷺ کے لیے خاص ہے اور عام لوگوں کو وسعت دی گئی ہے۔ 27۔ الطبرانی نے ابن عباس ؓ سے آیت ولا تمنن تستکثر کے بارے میں روایت کیا کہ کوئی آدمی کسی کو عطیہ نہ دے یہ امید کرتے ہوئے کہ وہ اس کو اس سے زیادہ دے گا۔ 28۔ عبد بن حمید وابن المنذر نے مجاہد (رح) سے آیت ولا تمنن تستکثر کے بارے میں روایت کیا کہ آپ اپنے نزدیک اپنے عمل کو بڑا نہ سمجھیں کہ آپ اپنے خیر کے کاموں کو بڑا سمجھنے لگے۔ 29۔ ابن مردویہ نے ابن عباس ؓ سے آیت ولا تمنن تستکثر کے بارے میں روایت کیا کہ تو ایسا نہ کہیں کہ میں نے ان کو دعوت دی ہے اور انہوں نے مجھ سے قبول نہ کیا واپس لوٹیے اور ان کو دعوت دیجیے آیت ولربک فاصبر اور تو اپنے رب کے لیے صبر کر اس پر۔