تفسیر درِ منثور

72۔ عبدالرزاق وعبد بن حمید وابن المنذر وابن مردویہ نے ابن مسعود ؓ سے آیت ولقد راٰہ بالافق المبین کے بارے میں روایت کیا کہ آپ نے جبریل (علیہ السلام) کو دیکھا کہ ان کے چھ سو پر تھے اور انہوں نے سارے افق کو گھیر رکھا ہے۔ 73۔ ابن مردویہ نے ابن عباس ؓ سے روایت کیا کہ آیت ولقد راٰہ بالافق المبین سے میری مراد جبریل (علیہ السلام) ہیں کہ محمد ﷺ نے ان کو اپنی اصلی صورت میں سدرۃ المنتہی کے پاس دیکھا۔ 74۔ عبد بن حمید وابن المنذر نے عکرمہ (رح) سے آیت ولقد راٰہ بالافق المبین کے بارے روایت کیا کہ آیت میں دیکھنے والے رسول اللہ ﷺ ہیں اور انہوں نے جبریل (علیہ السلام) کو افق میں دیکھا اور افق سے صبح مراد ہے۔ 75 ابن مرددویہ نے ابن عباس ؓ سے روایت کیا کہ آیت ولقد راٰہ بالافق المبین سے ساتواں آسمان مراد ہے۔ 76۔ الدارقطنی فی الافراد والخطیب فی تاریخہ والحاکم وصححہ وابن مردویہ نے عائشہ ؓ سے روایت کیا کہ نبی ﷺ اس طرح پڑھتے تھے۔ آیت وما ہو علی الغیب بظنین یعنی ظاء کے ساتھ۔