تدبرِ قرآن

مجرموں کی بے بسی کی تصویر: روز قیامت کی ہولناکی کی تصویر کے بعد یہ مجرموں کی بے بسی اور درماندگی کی تصویر ہے کہ آج تو قیامت کی تکذیب میں ہر ایک آگے بڑھ بڑھ کر طلاقت لسانی کا ثبوت دے رہا ہے لیکن اس دن سب کی زبانیں گنگ ہوں گی، کسی کے منہ سے بات نہ نکلے گی۔ آگے کی سورہ میں، جو اس کی مثنیٰ ہے، فرمایا ہے: ’لَا یَمْلِکُوْنَ مِنْہُ خِطَابًا‘ (النبا ۷۸: ۳۷) (اس دن مجرمین اس سے خطاب نہ کر سکیں گے)۔ قرآن میں یہ تصریح بھی ہے کہ اس دن مجرموں کے مونہوں پر مہر کر دی جائے گی اور اللہ تعالیٰ ان کے اعضاء کو ناطق بنا دے گا جو ان کے تمام جرائم کی گواہی دیں گے۔