Fi-Zilal-al-Quran

فَاِنْ لَّمْ يَسْتَجِيْبُوْا : پھر اگر وہ جواب نہ دے سکیں لَكُمْ : تمہارا فَاعْلَمُوْٓا : تو جان لو اَنَّمَآ : کہ یہ تو اُنْزِلَ : نازل کیا گیا ہے بِعِلْمِ اللّٰهِ : اللہ کے علم سے وَاَنْ : اور یہ کہ لَّآ اِلٰهَ : کوئی معبود نہیں اِلَّا هُوَ : اس کے سوا فَهَلْ : پس کیا اَنْتُمْ مُّسْلِمُوْنَ : تم اسلام لاتے ہو

فَاِنْ لَّمْ يَسْتَجِيْبُوْا لَكُمْ (اب اگر وہ (تمہارے معبود) تمہاری مدد کو نہیں پہنچتے) ۔ اور تم دس سورتیں گھڑ کر نہیں لاتے کیونکہ تمہارے معبود اس سلسلے میں تمہاری کچھ مدد نہٰں کرسکتے اور یہ تو کام بھی ایسا ہے جس کا ہونا ناممکن ہے ، اور تم خود بھی یہ کام بہرحال نہیں کرسکتے کیونکہ تم اپنے معبودوں کو تب ہی بلاتے ہو جب تم خود عاجز آجاؤ۔ فَاعْلَمُوْٓا اَنَّمَآ اُنْزِلَ بِعِلْمِ اللّٰهِ " تو جان لو کہ یہ اللہ کے علم سے نازل ہوئی ہے "۔ صرف اللہ ہی اس بات پر قدرت رکھتا ہے کہ وہ اسے نازل کرے۔ اور صرف اللہ کا علم ہی اس انداز میں اس کتاب کو نازل کرسکتا ہے اور اس قسم کے علوم اور دلائل دے سکتا ہے۔ اور کائنات کے احوال اور سنن بیان کرسکتا ہے اور انسانوں کے ماضی اور حال اور مستقبل کے لیے وہی یہ سب کچھ وضع کرسکتا ہے جو ان کی ذات و معاش کے لیے مفید ہے۔ وَاَنْ لَّآ اِلٰهَ اِلَّا هُوَ " اور یہ کہ اللہ کے سوا کوئی حقیقی معبود نہیں ہے " اگر ان کے الہ دس سورتیں نہیں لا سکتے تو پھر اس کا لازمی نتیجہ ہے کہ یہ کتاب منجانب اللہ ہے اور وہ جو دعوت دیتی ہے کہ اللہ کے سوا کوئی الہ نہیں وہ برحق ہے اور یہ کتاب اسی نے نازل کی ہے۔ فَهَلْ اَنْتُمْ مُّسْلِمُوْنَ " تو کیا تم سر تسلیم خم کرتے ہو " اس چیلنج اور پوری دنیا کی ناکامی کے بعد آخر کوئی معقول آدمی دعوت اسلامی کو تسلیم کرنے کے سوا اور کر کیا سکتا ہے ؟ لیکن یہ لوگ اس قدر ظالم ہیں کہ یہ اس عاجزی کے بعد بھی حق کا انکار کرتے ہیں۔ حقیقت یہ ہے کہ ان لوگوں پر سچائی تو بالکل واضح ہوگئی تھی لیکن اسلامی نظام کی وجہ سے ان کے مفادات ختم ہو رہے تھے۔ موجودہ جاہلی نظام ان کے لیے مفید تھا ، پھر اس نظام میں ان کو اقتدار اور سلطنت حاصل تھی۔ دعوت اسلامی تو آزادی ، انصاف اور ہر انسان کو عزت اور شرف عطا کرنے کی تحریک تھی۔ اور ان لوگوں نے دوسرے لوگوں کو اپنا غلام بنا رکھا تھا۔ لہذا لا الہ الا اللہ کی دعوت ان کے مفادات کے خلاف تھی۔ چناچہ اب (اگلی آیات میں) ان کے حسب حال یہ تبصرہ کیا جتا ہے جو ان کے حالات کی صحیح تصویر کشی کرتا ہے۔

Top