Tafseer-e-Madani - Al-Baqara : 169
اِنَّمَا یَاْمُرُكُمْ بِالسُّوْٓءِ وَ الْفَحْشَآءِ وَ اَنْ تَقُوْلُوْا عَلَى اللّٰهِ مَا لَا تَعْلَمُوْنَ
اِنَّمَا : صرف يَاْمُرُكُمْ : تمہیں حکم دیتا ہے بِالسُّوْٓءِ : برائی وَالْفَحْشَآءِ : اور بےحیائی وَاَنْ : اور یہ کہ تَقُوْلُوْا : تم کہو عَلَي اللّٰهِ : اللہ پر مَا : جو لَا تَعْلَمُوْنَ : تم نہیں جانتے
وہ تو تمہیں برائی اور بےحیائی ہی سکھائے گا، اور یہ کہ تم لوگ اللہ کے ذمے وہ باتیں لگاؤ جنہیں تم نہیں جانتے
453 شیطانی اغواء کے طور طریقے : یعنی تم نہیں جانتے کہ وہ کس قدر سنگین و خطرناک اور تمہاری عاقبت کو تباہ کرنے والی باتیں ہیں۔ مثلاً اللہ کی حرام کردہ اشیاء کو حلال بتانا اور اس کی حلال فرمودہ اشیاء کو حرام۔ یا یہ کہ ان اسباب و وسائل کو ترک کرکے وہمی اور شرکیہ وسائل کو اپنانے کی تلقین کرنا، جن اسباب و وسائل کے ساتھ قدرت نے اپنی سنن کونیہ میں مختلف اشیاء کو مربوط کر رکھا ہے۔ مثلاً یہ کہ کھیتی کیے بغیر فلاں حضرت فصل اگا دیں گے۔ پڑھے اور محنت کیے بغیر فلاں حضرت یونہی پاس کرا سکیں گے۔ (تفسیر الامام المراغی وغیرہ) ۔ سو اس طرح شیطان تمہیں ہلاکت و تباہی کے کیسے ہولناک گڑھے میں ڈالنا اور دھکیلنا چاہتا ہے۔ پس تم اس کے مکر و فریب اور اس کی چالبازیوں سے ہمیشہ بچتے رہنا، جس کا سب سے بڑا اور موثر ذریعہ ہے تقوی و پرہیزگاری۔ پس ہمیشہ اسی کو اپنائے رکھنا، اور ہر حال میں اپنے خالق ومالک سے ڈرتے رہنا اور اسی پر تکیہ و بھروسہ رکھنا اور اس کے ساتھ اپنا معاملہ رکھنے کی فکر اور کوشش کرتے رہنا ۔ وباللہ التوفیق ۔ بہرکیف فرمایا گیا کہ شیطان کی پیروی سے بچنا کہ وہ تمہیں برائی اور بےحیائی ہی سکھائے گا اور تم کو ہلاکت اور تباہی کے راستوں پر ڈالنے ہی کی کوشش کرے گا ۔ والعیاذ باللہ العظیم -
Top