1 : وَیْلٌ لِّکُلِّ ھُمَزَۃٍ لُّمَزَۃِ (بڑی خرابی ہے ایسے شخص کیلئے جو پس پشت عیب نکالنے والا اور رودررو طعنے دینے والا ہو)
نحو : ویل مبتدأ لکل ہمزہ اس کی خبر ہے۔ ہمزہؔ وہ شخص جو غیر موجودگی میں عیب نکالے۔ لُمزۃ۔ سامنے عیب نکالے۔ طعنہ زنی کرے۔
نکتہ : فَعَلۃ کا وزن اس بات پر دلالت کرتا ہے کہ یہ اس شخص کی عادت ثانیہ ہے۔
ایک قول یہ ہے :
کہ یہ اخنس بن شریق کے متعلق اتری۔ اس کی عادت غیبت تھی۔
ایک اور قول :
اّمیہ بن خلف کے متعلق اتری۔ ایک قول اور ہے کہ ولید کے متعلق نازل ہوئی۔
فیصلہ :
سبب خاص ہوسکتا ہے۔ اور وعید عام ہو۔ تاکہ ایسے تمام افراد کو شامل ہو جو اس قباحت کا ارتکاب کرنے والے ہوں۔