تفسیر القرطبی

تتبعھا الرادفہ۔ رادفہ سے مراد چیخ ہے، مجاہد، حضرت ابن عباس، حضرت حسن بصری اور قتادہ نے کہا، دونوں سے مراد چیخیں ہیں یعنی دونوں نفخے، جہاں تک پہلے نفخہ کا تعلق ہے وہ اللہ کے حکم سے ہر چیز کو ہلاک کردے گا، جہاں تک دوسرے نفخے کا تعلق ہے وہ اللہ کے حکم سے ہر چیز کو زندہ کردے گا حدیث میں نبی کریم کا ارشاد ہے، دونوں فخوں کے درمیان چالیس سال کا عرصہ ہوگا، مجاہد نے بھی کہا، رادفہ اس وقت ہوگا جب آسمان پھٹ جائے گا زمین اور پہاڑ اٹھالیے جائیں گے اور انہیں ایک ہی بار ریزہ ریزہ کردیا جائے گا، یہ سلسلہ زلزلہ کے بعد ہوگا ایک قول یہ کیا گیا ہے، راجفہ سے مراد زمین کا حرکت کرنا ہے رادفہ سے مراد دوسرا زلزلہ ہے جو زمینوں کو فنا کردے گا، اللہ تعالیٰ بہتر جانتا ہے، سورة النمل کے آخر میں ایسی بحث گزرچکی ہے جو صور پھونکنے کی بحث میں کافی وشافی ہے، رجفہ کا اصل معنی حرکت ہے اللہ تعالیٰ کا فرمان ہے، یوم ترجف الارض، المزمل 14) یہاں رجفہ سے مراد صرف حرکت نہیں بلکہ یہ رجف الرعد یرجف، رجفا ورجیفا سے مشتق ہے یہ اس وقت کہتے ہیں جب وہ آوز اور حرکت کو ظاہر کرے اسی سے ارا جیف کا لفظ ہے کیونکہ اس میں آوازیں مضطرب ہوتی ہیں اور لوگ اس میں بھاگ کھڑے ہوتے ہیں، شاعر نے کہا : ابالا راجیف یا بن اللوم توعدنی، وفی الاراجیف خلت اللوم الخوار۔ کیا تو ایسے قصائد میں (جورجزیہ بحر میں کہے گئے ہیں) مجھے دھمکی دیتا ہے اسے ملامت کرنے والے جبکہ میرا خیال تھا کہ ایسے قصائد میں ملامت اور ضعف کا طعنہ ہوگا۔ حضرت ابی بن کعب سے مروی ہے کہ جب رات کا ایک چوتھائی گزرجاتا ہے تو آپ اٹھتے پھر فرماتے، اے لوگو اللہ تعالیٰ کو یاد کرو راجفہ آچکی رادفہ کے پیچھے آرہی ہے موت اپنی سختیوں کے ساتھ آگئی۔