تفسیر القرطبی

انہ علی رجعہ لقادر۔ مجاہد اور ضحاک نے اس طرح کہا ہے ان دونوں سے یہ بھی مروی ہے، اس کا معنی ہے وہ پانی کو ریڑھ کی ہڈی میں لوٹانے پر قادر ہے، یہ عکرمہ کا قول ہے ضحاک سے بھی اسی طرح کا قول مروی ہے کہ معنی یہ ہے کہ اللہ تعالیٰ انسان کو پانی کی طرف لوٹانے پر قادر ہے جس طرح وہ پہلے تھا ان سے یہ بھی مروی ہے کہ معنی ہے وہ انسان کو بڑھاپے سے جوانی اور جوانی سے بڑھاپے کی طرف لوٹانے پر قادر ہے، مہدوی نے کہا، ماوردی اور ثعلبی نے کہا، بچپنے کی طرف اور بچپنے سے نطفہ کی طرف لوٹانے پر قادر ہے، حضرت ابن عباس قتادہ، حسن بصری اور عکرمہ نے یہ بھی کہا وہ انسان کو موت کے بعد لوٹانے پر قادر ہے، یہ طبری کا پسندیدہ نقطہ نظر ہے ثعلبی نے کہا، یہ قول سب سے قوی ہے کیونکہ اللہ تعالیٰ کا فرمان ہے یوم تبلی السرائر۔ الطارق) جس روز راز افشاں کردیے جائیں گے ماوردی نے کہا یہ احتمال موجود ہے کہ آخرت میں دوبارہ اٹھائے جانے کے بعد وہ دنیا کی طرف لوٹانے پر قادر ہے کیونکہ کفار آخرت میں اللہ تعالیٰ سے مطالبہ کریں گے کہ وہ انہیں دنیا میں بھیجے۔