تفسیر القرطبی

Al-Qurtubi · 92. Al-Lail · Ayah 12

Tafseer
  1. اِنَّ عَلَیْنَا لَلْهُدٰى٘ۖ﴿12﴾

    1. اِنَّبیشک
    2. عَلَيْنَاہم پر (ہمارا ذمہ)
    3. لَلْهُدٰىالبتہ راہ دکھانا
Translation · Al-Qurtubi
ہمیں تو راہ دکھا دینا ہے
Tafseer · Al-Qurtubi
ان علینا للھدی۔ یعنی ہمارے ذمہ کرم پر ہے کہ ہم گمراہی کے راستہ سے ہدایت کے راستہ کو جدا کردیں پس ہدایت سے مراد و احکام کا بیان ہوگا یہ زجاج کا نقطہ نظر ہے یعنی اللہ تعالیٰ کے ذمہ کرم پر ہے حلال و حرام اور اطاعت ومعصیت کا بیان۔ یہ قتادہ کا قول ہے فراء نے کہا، جو ہدایت کی راہ پر چلتا ہے تو اللہ تعالیٰ کے ذمہ پر ہے اس کا راستہ دکھانا کیونکہ اللہ تعالیٰ کا فرمان ہے وعلی اللہ قصدالسبیل۔ (النحل 9) وہ کہتا ہے کہ جس نے اللہ تعالیٰ کا ارادہ کیا وہ سیدھے راستے پر ہے۔ ایک قول یہ کیا گیا اس کا معنی ہے ہمارے قبضہ قدرت میں ہے ہدایت دینا اور گمراہ کرنا۔ اور اضلال کو ترک کردیا گیا ذکر نہیں کیا گیا جس طرح اللہ تعالیٰ کے اس فرمان میں صرف خیر کا ذکر کیا گیا، بیدک الخیر (آل عمران 26) بیدہ ملکوت شئی (یاسین 83) جس طرح فرمایا، سرابیلھم تقیکم الحر (النحل 81) جب کہ وہ سردی سے بھی بچاتا ہے ایک قول یہ کیا گیا ہے ہمارے ذمہ کرم پر ہے اسے ہدایت کا بدلہ دینا جسے ہم نے ہدایت سے نوازا۔ آخرہ۔ سے مراد جنت ہے اور اولی سے مراد دنیا ہے۔ عطا نے حضرت ابن عباس سے روایت نقل کی ہے یعنی دنیا وآخرت اللہ تعالیٰ کے لیے ہے ابوصالح نے حضرت ابن عباس سے روایت نقل کی ہے۔ اس سے مراد دنیاوآخرت کا ثواب ہے۔ یہ اسی طرح جس طرح اللہ تعالیٰ کا فرمان ہے، من کان یرید ثواب الدنیا فعنداللہ ثواب الدنیا والاخرہ۔ النساء 134) جس نے ان دونوں چیزوں کو ان کے مالکوں کے علاوہ غیر سے طلب کیا تو اس نے غلط راستہ کا انتخاب کیا۔