تفسیر درِ منثور

1۔ ابن الضریس نے ابو وائل ؓ سے روایت کیا کہ بنواسد کا ایک وفد نبی اکرم ﷺ کے پاس آیا آپ نے پوچھا تم کون ہو ؟ انہوں نے کہا ہم بنوالزینۃ۔ ہمیشہ گھوڑوں پر سوار رہنے والے لوگ ہیں۔ نبی اکرم ﷺ نے فرمایا تم بنو رشدہ ہو یہ سن کر حضرمی بن عامر نے کہا اللہ کی قسم ! ہم بنی المحوسلہ کی طرح نہیں ہوں گے۔ اور ان سے مراد بنو عبداللہ بن عطفان ہیں۔ ان کو بنو عبدالعزی بن غطفان کہا جاتا ہے۔ نبی اکرم ﷺ نے حضرمی سے فرمایا کیا تو قرآن میں سے کوئی چیز پڑھتا ہے ؟ اس نے کہا ہاں ! آپ نے فرمایا اس کو پڑھ تو اس نے پڑھا آیت عبس وتولی۔ پیغمبر نے تیوی چڑھائی اور منہ موڑ لیا۔ جہاں تک اللہ تعالیٰ نے اس کو پڑھانا چاہا وہاں تک اس نے پڑھا۔ پھر اس نے کہا۔ وہا الذی من علی الحبلی ماخرج منہا نسمۃ تسعی بین شرا سیف وحشا اور وہ ذات ہے جس نے حاملہ پر احسان فرمایا اور اس میں سے ایک روح کو نکالا جو وحشت ناک تکالیف کے درمیان دوڑ دھوپ کرتی۔ یہ سن کر نبی ﷺ نے فرمایا اس میں اضافہ نہ کیونکہ یہی کافی ہے۔ 2۔ ابن النجار نے انس ؓ سے روایت کیا کہ علاء بن یزید حضرمی نے نبی اکرم ﷺ کے پاس آنے کی اجازت مانگی۔ اس کو اجازت دے دی گئی۔ دونوں نے لمبی باتیں کیں پھر آپ نے اس سے فرمایا۔ اے علاء کیا تو قرآن میں سے کچھ حسین انداز میں پڑھ سکتا ہے ؟ اس نے کہا ہاں ! پھر اس نے آپ پر عبس والی سورت پڑھی یہاں تک کہ اس کو اس کے آخر تک ختم کیا اور اس کے آخر میں اپنے پاس سے یہ زیادہ کیا کہ وہ ذات ہے جس نے حامہ عورت پر احسان کیا اور اس نے ایک ذی روح کو نکالا جو وحشت ناک تکالیف کے درمیان دوڑتی ہے نبی ﷺ نے زور سے آواز دی اے علاء بس کر سورة ختم ہوچکی ہے۔ واللہ اعلم۔ 3۔ الترمذی وحسنہ وابن المنذر وابن حبان والحاکم وصححہ وابن مردویہ نے عائشہ ؓ سے روایت کیا کہ سورة عبس وتولی ابن ام مکتون نابینا کے بارے میں نازل ہوئی جو رسول اللہ ﷺ کے پاس آیا اور کہنا شروع کیا یارسول اللہ ! مجھے ہدایت کیجیے اور رسول اللہ ﷺ کے پاس مشرکین کے سرداروں میں ایک آدمی بیٹھا تھا۔ اس کے آنے سے آپ کو ناگواری ہوئی تو رسول اللہ ﷺ نے اس سے اعراض فرمایا اور دوسرے آدمی کی طرف توجہ دینے لگے اور اس سے فرمایا کیا تو کسی حرج کو دیکھتا ہے جو میں کہہ رہا ہے۔ اس نے کہا نہیں۔ تو اس کے بارے میں یہ سورة نازل ہوئی۔ سورت کی شان نزول 4۔ ابن المنذر وابن مردویہ عائشہ ؓ سے روایت کیا کہ رسول اللہ ﷺ قریش کے سرداروں میں سے کئی لوگوں کی مجلس میں تشریف فرما تھے۔ ان میں سے ابو جہل بن ہشام اور عتبہ بن ربیعہ تھے۔ آپ ان سے فرما رہے تھے۔ کیا یہ اچھا نہیں ہے کہ میں اس اس طرح کے ساتھ آیا انہوں نے کہا کیوں نہیں۔ اللہ کی قسم ! اتنے میں ابن ام مکتوم ؓ آگئے اور آپ ان کے ساتھ مشغول تھے۔ اس نے سوال کیا آپ نے اس سے اعراض فرمایا تو اللہ تعلیٰ نے یہ آیت نازل فرمائی آیت اما من استغنی۔ فانت لہ تصدی وما علیک الا یزکی واما من جاءک یسعی۔ وہو یخشی فانت عنہ تلہی۔ لیکن وہ جو پروا نہیں کرتا سو آپ اس کے لیے توجہ کرتے ہیں اور جو لیکن آپ کے پاس دوڑتا ہوا آیا اور وہ ڈر رہا ہے تو آپ اس سے بےپروائی کرتے ہیں۔ یعنی ابن ام مکتوم ؓ۔ 5۔ عبدالرزاق وعبد بن حمید وابو یعلی نے انس ؓ سے روایت کیا کہ ابن ام امکتوم ؓ ، نبی مکرم ﷺ کے پاس آئے اور آپ ابی بن خلف سے باتیں فرما رہے تھے۔ اس لیے آپ نے ان سے اعراض فرمایا تو اس پر اللہ تعالیٰ نے یہ نازل فرمایا آیت عبس وتولی ان جاء ہ الاعمی۔ آپ نے تیوری چڑھائی اور منہ موڑ لیا کہ ان کے پاس ایک اندھا آیا اس کے بعد نبی اکرم ﷺ اس کا اکرام فرماتے تھے۔ 6۔ ابن جریر وابن المردویہ نے ابن عباس ؓ سے روایت کیا کہ اس درمیان کہ رسول الہ ﷺ عتبہ بن ربیعہ، عباس بن عبدالمطلب اور ابو جہل بن ہشام سے گفتگو فرما رہے تھے۔ اور آپ ان کی طرف بہت زیادہ توجہ فرما رہے تھے۔ آپ چاہتے تھے کہ یہ ایمان لے آئیں اچانک ایک نابینا آدمی سامنے آیا جس کو عبداللہ بن ام مکتوم ؓ کہا جاتا تھا وہ آپ ﷺ کی طرف چل رہا تھا اور آپ ان لوگوں سے سرگوشی فرما رہے تھے عبداللہ ؓ نے آتے ہی نبی مکرم ﷺ سے قرآن مجید میں سے کسی آیت کا مطالبہ کرنے لگے۔ اور عرض کیا یارسول اللہ ! مجھے اس میں سے سکھائیے جو آپ کو اللہ نے سکھایا ہے۔ رسول اللہ ﷺ نے ان سے اعراض فرمایا اور اپنے چہرہ مبارک میں تیوری چڑھالی اور اس سے منہ پھیرلیا اور اس کی بات کو ناپسند فرمایا اور دوسروں کی طرف متوجہ رہے پھر جب رسول اللہ ﷺ پھر جب رسول اللہ ﷺ نے اپنی بات کو پورا کرلیا اور اپنے اہل و عیال کی طرف جانے لگے تو اللہ تعالیٰ نے ان کی کچھ بصارت کو روک لیا اور اونگ کے سبب آپ کا سر حرکت کرنے لگا پھر اللہ تعالیٰ نے یہ آیت نازل فرمائی آیت عبس وتولی ان جاء ہ الاعمی جب اس کے بارے میں یہ آیت نازل ہوئی تو اللہ کے نبی ﷺ اس کا اکرام فرماتے اور ان سے بات کرتے اور فرماتے تیری کیا حاجت ہے کیا تو کسی چیز کا ارادہ رکھتا ہے۔ 7۔ سعید بن منصور عبد بن حمید وابن المنذر نے ابو مالک (رح) سے آیت عبس وتولی کے بارے میں روایت کیا کہ آپ ﷺ کے پاس عبداللہ بن ام مکتوب ؓ آئے تو آپ نے اپنے چہرے میں تیوری چڑھائی اور منہ پھیرلیا اور آپ امیہ بن خلف کی طرف توجہ فرما رہے تھے تو اللہ تعالیٰ نے فرمایا آیت اما من استغنی فانت لہ تصدی لیکن وہ جو پروا نہیں کرتا ہو آپ اس کے لیے توجہ کرتے ہیں۔ 8۔ ابن ابی حاتم نے حکم (رح) سے روایت کیا کہ اس آیت کے بعد رسول اللہ ﷺ کو کسی مالدار کی طرف توجہ کرتے ہوئے اور کسی فقیر سے اعراض کرتے ہوئے نہیں دیکھا گیا۔ 9۔ ابن ابی حاتم نے ابن زید ؓ سے روایت کیا کہ اگر رسول اللہ ﷺ وحی میں سے کسی چیز کو چھپاتے تو اپنی ذات کے بارے میں تو اس آیت کو ضرور چھپاتے عبداللہ بن ام مکتوم کی فضیلت 10۔ طبرانی وابن مردویہ نے ابو امامہ ؓ سے روایت کیا کہ نابینا ابن ام مکتوم ؓ آئے اور یہ وہ صحابی ہے جن کے بارے میں آیت عبس وتولی ان جاء الاعمی نازل ہوئی۔ اس نے عرض کیا یارسول اللہ ! کہ آپ جانتے ہیں کہ میں بوڑھا ہوگیا ہوں اور میر ہڈیا کمزور ہوگئی ہیں اور میری نظر چلی گئی۔ ایک شخص مجھ کو پکڑ کرلے جاتا ہے مگر اس کا میری رہنمائی کرنا مناسب نہیں لگتا۔ کیا آپ میرے لیے یہ رخصت دیتے ہیں کہ میں پانچوں نمازیں اپنے گھر میں ادا کرلوں ؟ آپ ﷺ نے پوچھا کیا تو موذن کی آواز کو سنتا ہے ؟ اس نے کہا ہاں ! فرمایا میں تیرے لیے کوئی رخصت نہیں پاتا۔ 11۔ ابن مردویہ نے کعب بن عجرہ ؓ سے روایت کیا کہ ایک نابینا جس کے بارے میں اللہ تعالیٰ نے سورة عبس وتولی نازل فرمائی۔ وہ نبی اکرم ﷺ کے پاس آیا اور کہنے لگا یا رسول اللہ ! بیشک میں اذان کی آواز کو سنتا ہوں اور میں اپنے لیے کوئی لے جانے والا نہیں پاتا۔ آپ ﷺ نے فرمایا جب تو اذان سنے تو اللہ کی دعوت کو قبول کر۔