تفسیر درِ منثور
Dure-Mansoor · 93. Ad-Dhuhaa · Ayah 5
Tafseerوَ لَسَوْفَ یُعْطِیْكَ رَبُّكَ فَتَرْضٰىؕ﴿5﴾
- وَلَسَوْفَاور عنقریب
- يُعْطِيْكَآپ کو عطا کریگا
- رَبُّكَآپ کا رب
- فَتَرْضٰىپس آپ راضی ہوجائیں گے
Translation · Dure-Mansoor
اور عنقریب اللہ تعالیٰ آپ کو دے گا سو آپ خوش ہوجائیں گے
Tafseer · Dure-Mansoor
22۔ ابن جریرنے سدی کے طریق سے ابن عباس ؓ سے آیت ولسوف یعطیک ربک فترضی کے بارے میں روایت کیا کہ محمد ﷺ کی رضا تو یہ ہے کہ آپ کے اہل بیت میں سے کوئی بھی دوزخ میں داخل نہ ہو۔
23۔ البیہقی نے شعب الایمان میں سعید بن جبیر کے طریق سے ابن عباس رضٰ اللہ عنہما سے آیت ولسوف یعطیک ربک فترضی کے بارے میں روایت کیا کہ آپ کی رضا تو یہ ہے کہ آپ کی ساری امت جنت میں داخل ہو۔
24۔ الخطیب نے تلیخیص المتشابہ میں دوسری سند سے ابن عباس ؓ سے آیت ولسوف یعطیک ربک فترضی کے بارے میں روایت کیا کہ محمد ﷺ اس بات سے راضی نہیں ہوں گے جب تک ان کی امت میں سے ایک آدمی بھی دوزخ میں ہوگا۔
25۔ مسلم نے ابن عمرو ؓ سے روایت کیا کہ نبی ﷺ نے اللہ تعالیٰ کے اس قول کو تلاوت فرمایا جو ابراہیم (علیہ السلام) کے بارے میں آیت فمن تبعنی فانہ منی (ابراہیم آتی 36) سو جس نے میری تابعداری کی بیشک وہ مجھ سے ہے اور عیسیٰ (علیہ السلام) کا قول تلاوت فرمایا آیت ان تعذبہم فانہم عبادک ( المائدہ آیت 118) اگر تو ان کو عذاب دے گا تو بیشک وہ تیرے بندے ہیں۔ پس آپ نے ہاتھ اٹھائے اور فرمایا اے اللہ میری امت میری امت اور رونے لگے اللہ تعالیٰ نے فرمایا : اے جبریل محمد ﷺ کے پاس جاؤ اور اس سے کہو ہم عنقریب تجھ کو راضی کردیں گے تیری امت کے بارے میں اور ہم تجھ کو نہ بھولیں گے۔
امت کے لیے شفعت کرنا۔
26۔ ابن المنذر وابن مردویہ وابو نعیم نے الحلیہ میں حرب بن شریح (رح) کے طریق سے روایت کیا کہ میں نے ابو جعفر محمد بن علی بن حسین ؓ سے کہا۔ مجھے اس شفاعت کا بتائیے جو عراق والے بیان کرتے ہیں۔ کیا وہ سچ ہے ؟ فرمایا اللہ کی قسم ! مجھ کو میرے چچا محمد بن الحنفیہ نے علی ؓ سے بیان فرمایا کہ رسول اللہ ﷺ نے فرمایا میں اپنی امت کی شفاعت کروں گا یہاں تک کہ مجھے میرا رب آواز دے گا۔ اے محمد ﷺ کیا آپ راضی ہیں۔ میں کہوں گا ہاں میرے رب میں راضی ہوں۔ پھر وہ مجھ پر متوجہ ہوئے اور فرمایا کہ تم لوگ کہتے ہو اے اہل عراق کی جماعت ! اللہ کی کتاب میں سے سب سے زیادہ امید افزاء یہ آیت ہے آیت یعبادی الذین اسرفوا علی انفسہم لا تقنطوا من رحمۃ اللہ ان اللہ یغفر الذنوب جمیعا۔ (الزمر آیت 53) اے میرے بندو ! جنہوں نے اپنی جانوں پر زیادتی کی اللہ کی رحمت سے مایوس نہ ہوجاؤ بیشک اللہ تعالیٰ سب گناہوں کو بخش دیں گے۔ میں نے کہا بلابشہ ہم بھی یہی کہتے ہیں تو انہوں نے فرمایا ہم سب اہل بیت یہ کہتے ہیں کہ اللہ کی کتاب میں سے سب سے زیادہ امید افزاء آیت یہ ہے آیت ولسوف یعطیک ربک فترضی اور وہ شفاعت ہے۔
27۔ ابن ابی حاتم نے حسن (رح) سے رویت کیا کہ اس قول آیت ولسوف یعطیک ربک فترضی کے بارے میں پوچھا گیا تو فرمایا اس سے مراد شفاعت ہے۔
28۔ ابن ابی شیبہ نے ابن مسعود ؓ سے روایت کیا کہ رسول اللہ ﷺ نے فرمایا : ہم اہل بیت ہیں ہمارے لیے اللہ تعالیٰ نے دنیا پر آخرت کو پسند فرمایا ہے اور چن لیا ہے آیت ولسوف یعطیک ربک فترضی۔
29۔ العسکری فی المواعظ وابن مردویہ وابن لال وابن النجار نے جابر بن عبداللہ ؓ سے روایت کیا کہ رسول اللہ ﷺ فاطمہ ؓ کے پاس تشریف لائے اور وہ چکی کے ذریعہ آٹا پیس رہی تھیں۔ اور وہ اونٹ کی اون کی چادر پہنے ہوئی تھیں۔ جب آپ نے ان کی طرف دیکھا تو فرمایا اے فاطمہ ! جلدی کرو اور دنیا کی مشقت اور تکلیف کو آخرت کی نعمتوں کے لیے برداشت کرو۔ تو اللہ تعالیٰ نے یہ آیت نازل فرمائی آیت ولسوف یعطیک ربک فترضی۔
30۔ ابن مردویہ نے عکرمہ (رح) سے روایت کیا کہ جب یہ آیت آیت وللاٰخرۃ خیر لک من الاولی۔ اور البتہ آخرت آپ کے لیے دنیا سے بہتر ہے۔ تو حضرت عباس بن عبدالمطلب نے فرمایا اللہ تعالیٰ اپنے نبی مکرم ﷺ کو تمہارے درمیان نہیں رہنے دے گا مگر تھوڑا سا وقت اس لیے کہ وہ وہی ان کے لیے بہتر اور خیر ہے۔
31۔ عبد بن حمید وابن جریر وابن ابی حاتم نے قتادہ (رح) سے آیت ولسوف یعطیک ربک فترضی کے بارے میں روایت کیا کہ یہ قیامت کے دن ہوگا کلہ آپ کا رب آپ کو اتنا دے گا کہ آپ راضی ہوجائیں گے اور وہ جنت ہے۔
32۔ ابن ابی حاتم والبیہقی فی الدلائل وابن عساکر نے موسیٰ بن علی بن رباح (رح) کے طریق سے روایت کیا اور وہ اپنے والد سے روایت کرتے ہیں کہ میں مسلمہ بن مخلد (رح) کے پاس تھا اور ان کے پاس عبداللہ بن عمرو بن عاص ؓ بھی بیٹھے ہوئے تھے اور مسلمہ نے ابو طالب ؓ کے شعر میں سے ایک بیت کے ساتھ ایک مثال بنائی۔ اور کہا اگر ابو طالب دیکھ لیتے کہ آج کے دن اللہ نے ہم کو نعمتیں اور عزتیں عطا فرمائیں ہیں تو وہ یقیناً جان لیتے کہ ان کا بھتیجا سردار ہے اور خیر کثیر لے کر آیا ہے۔ عبداللہ ؓ نے فرمایا کہ آپ ﷺ اس دن بھی سردار اور کریم تھے یقیناً آپ خیر کثیر لے کر آئے۔ تو مسلمہ ؓ نے فرمایا کیا اللہ تعالیٰ نے یہ نہیں فرمایا آیت الم یجدک یتیما فاوی، ووجدک ضالا فہدی، ووجد عائلافاغنی۔ کیا اس نے آپ کو یتیم نہیں پایا تھا پھر جگہ دی اور آپ کو بیخبر پایا تو ہدایت دی اور اس نے آپ کو تنگدست پایا پھر غنی کردیا۔ عبداللہ ؓ نے فرمایا آپ کا یتیم ہونا تو آپ اپنے والدین کی نسبت سے یتیم تھے اور عائل (حاجت مند) اس لیے فرمایا ہے کہ جو کچھ ظاہری مال و دولت عربوں کے پاس تھی اس کی نسبت آپ تنگ دست تھے۔