تدبرِ قرآن

وَجَاۗءَتْ سَيَّارَةٌ فَاَرْسَلُوْا وَارِدَهُمْ فَاَدْلٰى دَلْوَهٗ ۭ قَالَ يٰبُشْرٰي ھٰذَا غُلٰمٌ ۭ وَاَسَرُّوْهُ بِضَاعَةً ۭ وَاللّٰهُ عَلِيْمٌۢ بِمَا يَعْمَلُوْنَ۔ " وارد " کا مفہوم : " وارد " کے اصل معنی تو کسی گھاٹ یا چشمہ پر اترنے والے کے ہیں۔ عرب میں قافلے والے یوں کرتے کہ جس کنوئیں میں اترنا ہوتا ذرا پہلے اپنا ایک آدمی اس پر بھیج دیتے کہ وہ پانی وغیرہ کا انتظام کر رکھے۔ یہاں وارد سے وہی مراد ہے۔ خدائے کارساز کی کارسازی : برادران یوسف تو ان کو کنوئیں میں ڈال کر گھر کو سدھارے۔ ادھر رب کریم و کارساز نے یہ انتظام فرمایا کہ ایک قافلہ آ نکلا اور اس نے اپنے پانی کے منتظم کو کنوئیں پر بھیجا۔ اس نے ڈول ڈالا تو دیکھتا ہے کہ کنوئیں میں ایک لڑکا ہے۔ وہ خوشی سے چلایا کہ خوش خبری ہو، اس میں تو ایک لڑکا ہے ! اس دور میں بردہ فروشی کا رواج عام تھا۔ انہوں نے سوچا کہ چلو ایک نفع کی چیز مل گئی۔ کہیں بیچ لیں گے اور اس خیال سے کہ کہیں داہنے بائیں کوئی مدعی نہ اٹھ کھڑا ہو اس واقعہ کو انہوں نے راز میں رکھنے کی کوشش کی، اس کی تشہیر نہیں ہونے دی۔ واللہ علیم بما یعملون اور اللہ کو خوب پتہ تھا کہ وہ کیا کررہے تھے۔ وہ تو اپنی اسکیم پوری کر رہے تھے اور اللہ اپنی اسکیم پوری کر رہا تھا۔ انہیں تو ایک غلام ملا تھا۔ خوش تھے کہ اس کو بیچ کر کچھ پیسے حاصل کرلیں گے اور اللہ نے یہ چاہا کہ یوسف کی یہ غلامی مصر کی بادشاہی کی تمہید ثابت ہو۔