تدبرِ قرآن

ومن ایتہ انک تری الارض خاشعۃ فاذا انزلنا علیھا المآء اھتزت وربتہ ان الذین احیا ھالمحی الموتی انہ علی کل شیء قدیر (39) قیامت کی یاد دانی توحید کے بعد یہ قیامت کی یاد دانی فرمائی کہ جو لوگ قیامت کو مستبعد خیال کر ہرے ہیں وہ اس زمین میں اللہ کی نشانیوں کا مشاہدہ کریں۔ دیکھتے ہو کہ زمین بالکل خشک، بےجان اور بےبرگ وگیاہ ہوتی ہے کہ ہم اپنی عنایت سے اس پر رحمت کی گھٹا برسا دیتے ہیں تو دیکھتے دیکھتے اس میں زندگی کی حرکت نمایاں ہوجاتی ہے، اس کی پستی میں سبزہ اور نباتات سے ابھار پیدا ہوجاتا ہے اور اس کے ہر گوشے میں روئیدگی اور نشو و نما کی بہار آجاتی ہے۔ ان الذی احیا ھا لمحی الموتی فرمایا کہ جو خدا اپنی قدرت سے اس زمین کو بار بار مردہ اور بار بار زندہ کرتا رہتا ہے۔ وہ ضرور اس بات پر قادر ہے کہ انسانوں کو بھی ان کے مر جانے کے بعد جب چاہے اٹھا کھڑا کرے۔ انہ علی کل شیء قدیر یہ اس لئے کہ اللہ تعالیٰ ہر چیز پر قادر ہے۔ اگر وہ ہر چیز پر قادر نہ ہو تو خدا نہیں ہے۔