تدبرِ قرآن

بل ظننتم ان لن ینقلب الرسول والمومنون الی اھلیھم ابداً وذین ذلک فی قلوبکم و ظننتم ظن السوہ وکنتم قوماً بوراً 12 منافقین کے دلوں کا اصلی بھید اوپر والی آیت میں ان کے دلوں کے جس بھید کی طرف اشارہ فرمایا ہے یہ اس کی وضاحت ہے کہ اصل چیز جس نے تم کو اس سفر سے روکا وہ تمہارا یہ گمان تھا کہ اب کے قریش ان مسلمانوں کو کچا ہی کھا جائیں گے اور کبھی ان کو اور ان کے پیغمبر کو اپنے اہل و عیال کا منہ دیکھنا نصیب نہ ہوگا۔ وزین ذلک فی قلوبکم وظننتم ظن السوء یعنی یہ گمان چونکہ تمہارا ایک دل پسند گمان تھا اس وجہ سے تم نے اپنے دلوں میں اس کو اچھی طرح آراستہ کیا اور سنت الٰہی کے مطابق یہ تمہارے دلوں میں اچھی طرح کھبا دیا گیا۔ پھر اس کے زیر اثر تم نے اسلام کے مستقبل سے متعلق نہایت برے برے گمان کئے اور یہ سمجھ بیٹھے ہ بس اب چند دنوں کے اندر اندر اس کا قصہ تمام ہوا جاتا ہے۔ وکنتم قوماً بوراً ، یعنی تم تو اسلام اور مسلمانوں کی تباہی کے منتظر رہے لیکن اللہ تعالیٰ نے تمہارے علم الرغم ان کو فتح مبین عطا فرمائی البتہ تم لوگ جو اس بات پر نازاں رہے کہ پیغمبر کا ساتھ نہ دے کہ تم نے بڑے دانش مندانہ اور کامیاب سیاست اختیار کی، اپنے آپ کو ہلاکت کے کھڈ میں گرانے والے بنے۔ بور جمع ہے بائر کی اس کے معنی ہلاک ہونے والے کے ہیں۔