تدبرِ قرآن

اس ٹکڑے کی شرح آیت الکرسی کے تحت وضاحت سے ہوچکی ہے۔ مطلب یہ ہے کہ اللہ کا علم سب کو محیط ہے۔ ہر ایک کے ماضی و مستقبل اور حاضر و غائب سب سے وہ واقف ہے۔ دوسرے کسی کی یہ حیثیت نہیں کہ اس کا علم خدا کے علم کا احاطہ کرسکے تو یہ مقام کس کا ہے کہ وہ کسی کے باب میں خدا کے علم میں کوئی اضافہ اور اس بنیاد پر اس کے حق میں کوئی سفارش کرسکے ! خدا کسی کے متعلق کسی سے یہ معلوم کنے کا محتاج نہیں ہے کہ وہ کس قسم کا آدمی ہے۔ اس کے اعمال کیا رہے ہیں اور وہ کیا معاملہ کئے جانے کا مستحق ہے ؟ یہ ساری چیزیں اس کے علم میں موجود ہیں۔ اس مسئلے پر سورة مریم کی آیت 87 کے تحت جو بحث گزر چکی ہے اس پر بھی ایک نظر ڈال لیجیے۔