تدبرِ قرآن

یہ ان کے مقابل میں فائز المرام گروہ کا بیان ہوا کہ البتہ جو لوگ ایمان کے ساتھ خدا کے پاس حاضر ہوں گے اور اس کے ساتھ انہوں نے نیک اعمال بھی کیسے ہوں گے ان کے لئے مراتب عالیہ ہیں۔ ایمان کی مقبولیت کے لئے اعمال صالحہ شرط ہیں مومنا قد عمل الصلحت کے اسلوب بیان پر غور کیجیے تو یہ بات صاف واضح ہوتی ہے کہ اللہ تعالیٰ کے ہاں معتبر ایمان وہی ہے جس کے ساتھ عمل صالح بھی پایا جاتا ہے۔ جو ایمان عمل صالح سے خالی ہو اس کی خدا کے ہاں کوئی پوچھ نہیں ہے۔ ایسا ایمان ایک ٹونٹھ درخت کے مانند ہے جو برگ و بار سے بالکل خالی ہے۔ جس درخت نے دنیا میں اپنے برگ و بار پیدا نہیں کئے آخر وہ آخرت میں کس طرح ثمر بار ہوجائے گا ! خدا کے ہاں اعمال کی مقبولیت کے لئے جس طرح ایمان شرط ہے اسی طرح ایمان کی مقبولیت کے لئے اعمال صالحہ شرط ہیں۔