Tafseer-e-Baghwi

قُلْ یٰعِبَادِ الَّذِیْنَ اٰمَنُوا اتَّقُوْا رَبَّكُمْ١ؕ لِلَّذِیْنَ اَحْسَنُوْا فِیْ هٰذِهِ الدُّنْیَا حَسَنَةٌ١ؕ وَ اَرْضُ اللّٰهِ وَاسِعَةٌ١ؕ اِنَّمَا یُوَفَّى الصّٰبِرُوْنَ اَجْرَهُمْ بِغَیْرِ حِسَابٍ

قُلْ : فرمادیں يٰعِبَادِ : اے میرے بندو الَّذِيْنَ : جو اٰمَنُوا : ایمان لائے اتَّقُوْا : تم ڈرو رَبَّكُمْ ۭ : اپنا رب لِلَّذِيْنَ : ان کے لیے جنہوں نے اَحْسَنُوْا : اچھے کام کیے فِيْ : میں هٰذِهِ الدُّنْيَا : اس دنیا حَسَنَةٌ ۭ : بھلائی وَاَرْضُ اللّٰهِ : اور اللہ کی زمین وَاسِعَةٌ ۭ : وسیع اِنَّمَا : اس کے سوا نہیں يُوَفَّى : پورا بدلہ دیا جائے گا الصّٰبِرُوْنَ : صبر کرنے والے اَجْرَهُمْ : ان کا اجر بِغَيْرِ حِسَابٍ : بےحساب

کہہ دو کہ اے میرے بندو جو ایمان لائے ہو اپنے پروردگار سے ڈرو جنہوں نے اس دنیا میں نیکی کی ان کے لئے بھلائی ہے اور خدا کی زمین کشادہ ہے جو صبر کرنے والے ہیں ان کو بیشمار ثواب ملے گا

10، قل یاعباد الذین امنوا اتقواربکم ، اس کی اطاعت کرکے اور اس کی نافرمانیوں سے بچ کر۔ ، للذین احسنوافی ھذہ الدنیا حسنۃ، جو ایمان لائے اور اچھے عمل کیے۔ ، حسنۃ، جنت ہے۔ اس کے قائل قتادہ ہیں اور سدی (رح) فرماتے ہیں کہ اس دنیا میں ، حسنۃ، یعنی صحت اور عافیت ہے۔ ، وارض اللہ واسعۃ، ابن عباس ؓ فرماتے ہیں کہ یعنی تم مکہ سے کوچ کرو اور اس آیت میں ایسے شہر سے ہجرت کرنے پر ابھارا گیا ہے جہاں معاصی ظاہر ہورہے ہوں اور بعض نے کہا ہے کہ آیت حبشہ کی طرف ہجرت کرنے والوں کے بارے میں نازل ہوئی ہے۔ اور سعید بن جبیر (رح) فرماتے ہیں کہ جس شخص کو کسی شہر میں گناہوں کا حکم دیاجائے وہ وہاں سے کسی دوسرے شہردوڑجائے۔ انما یوفی الصبرون سے کون لوگ مراد ہیں ، انما یوفی الصابرون اجرھم بغیر حساب ، یعنی جو لوگ اپنے دین پر صبر کرتے ہیں اور تکلیف کی وجہ سے اس کو نہیں چھوڑ تے اور بعض نے کہا ہے کہ یہ آیت جعفربن ابی طالب اور ان کے ساتھیوں کے بارے میں نازل ہوئی ہے کہ انہوں نے اپنا دین سخت مصائب کے باو جود بھی نہیں چھوڑا اور صبر کیا اور ہجرت کی ۔ حضرت علی ؓ فرماتے ہیں کہ مصائب زوہ لوگوں کو لایا جائے گا اور ان کے لیے ترازو نہیں مقررکیاجائے گا اور ان کے لیے دفتر نہیں کھولاجائے گا اور ان پر اجر بغیر حساب کے بہایاجائے گا۔ اللہ تعالیٰ نے فرمایا :، انما یوفی الصابرون اجرھم بغیر حساب ، حتی کہ دنیا میں عافیت کی زندگی گزارنے والے یہ تمنا کریں گے کہ ان کے جسم قینچیوں سے کاٹے جاتے ۔ یہ تمنا مصیبت زدہ لوگوں کے فضل کو دیکھ کر کریں گے۔

Top