Mazhar-ul-Quran

جنت کے اوصاف اور اہل جنت کی اعلی زندگی۔ (ف 1) جن لوگوں کے دل میں قیامت کے دن اللہ تعالیٰ کے سامنے کھڑے ہونے اور حساب وکتاب کا خوف ہے اور وہ لوگ اس خوف کے سبب سے فرض اور نفل عبادت کے بجالانے اور گناہوں سے بچنے میں احکام شرع کے پابند ہیں قیامت کے دن اللہ ان کی بڑی عزت فرمائے گا کہ ایک جنت ان کے نیک عمل کے بدلے میں اور ایک ان کے خوف کے بدلے میں اس طرح ان کو دوجنتیں ملیں گی۔ اور وہ دو عالیشان باغ جن کے اوصاف بیان کرتا ہے کہ وہ دونوں باغ ایسے ہوں گے جن میں مختلف قسم کے پھل ہوں گے اور درختوں کی شاخیں نہایت پر میوہ اور سایہ دار ہوں گی اور ان باغوں کی یہ بھی صفت ہے یعنی وہ ایسے باغ ہوں گے جن میں چشمے جاری ہوں گے اور وہ کسی وقت تھمتے نہیں نہ خشک ہوتے ہیں اور ان میں ہر ایک میوہ سے دوقسمیں ہوں گی یعنی تر اور خشک ۔ یا ایک ترش اور ایک شیریں ، یا ایک مثل دنیا کے میوے کے ہوگا اور وہ لوگ وہاں عیش کریں گے شان و شوکت عزت سے مسندو پر تکیہ لگائے ایسے فرشوں پر بیٹھے ہوں گے جن کے استر نہایت دبیر لطیف وخوش نما وگراں بہارریشمی ہوں گے اور ابرے باریک ریشمی ہوں گے ۔ حضرت عبداللہ بن مسعود کا قول ہے کہ جس بچھونے کا استر ریشمی کپڑے بیش قیمت کا ہوگا، اس بچھونے کے بارے کا حال اللہ کو معلوم ہے کہ کیسا ہوگا، آگے فرمایا کہ جنت کی میوہ دار شاخیں ایسی حالت پر ہوں گی کہ کھڑے بیٹھے لیٹے سب طرح ان شاخوں کا میوہ جنتی لوگ کھاسکیں گے ، اور ان باغوں میں یعنی سب جنتوں میں حوریں ہیں شرمیلی نگاہوں والی، باعصمت وعفت ، نیچی آنکھیں رکھنے والی، جس سے سوائے ان ازواج کے اور کسی نے بات بھی نہیں کی ہوگی اور وہ ایسی خوبصورت خوش رنگ ہوں گی کہ گویا کہ یاقوت اور موتی ہیں۔ یعنی صفائی اور سرخی یاقوت کی اور چمک اور سفیدی چھوٹے موتی کی سی ہوگی، آگے فرمایا کہ یہ کیونکر ہوسکتا ہے کہ ان کو یہ نعمتیں نہ ملیں کہ نیکی کا بدلہ بجز نیکی اور کیا ہے یعنی جب انہوں نے دنیا میں نیک کام کیے ایمان لائے توحید اختیار کی تو ہم ان کو ضرور جنت دیں گے جب ہم نے دنیا میں ان پر احسان کیا توحید کی توفیق دی تو کیا اس توحید کا بدلہ آخرت میں نہ دیں گے۔

Top