ام المؤمنین عائشہ ؓ کہتی ہیں کہ بریرہ میں تین سنتیں سامنے آئیں ایک تو یہ کہ جب وہ آزاد ہوئیں تو انہیں اختیار دیا گیا، اور ان کے شوہر غلام تھے، دوسرے یہ کہ لوگ بریرہ ؓ کو صدقہ دیا کرتے اور وہ نبی اکرم ﷺ کو ہدیہ کر دیتیں، تو آپ ﷺ فرماتے: وہ اس کے لیے صدقہ ہے، اور ہمارے لیے ہدیہ ہے ، تیسرے یہ کہ آپ ﷺ نے انہیں کے سلسلہ میں فرمایا: حق ولاء (غلام یا لونڈی کی میراث) اس کا ہے جو آزاد کرے ١ ؎۔
تخریج دارالدعوہ: تفرد بہ ابن ماجہ، (تحفة الأشراف: ١٧٤٣٢)، وقد أخرجہ: صحیح البخاری/العتق ١٠ (٢٥٣٦)، الأطعمة ٣١ (٥٤٣٠)، الفرائض ٢٠ (٦٧٦٠)، ٢٢ (٦٧٥٤)، ٢٣ (٦٧٥٩)، سنن ابی داود/الفرائض ١٢ (٢٩١٦)، سنن الترمذی/البیوع ٣٣ (٢١٢٦)، الولاء ١ (٢١٢٥)، سنن النسائی/الطلاق ٣٠ (٣٤٧٩)، موطا امام مالک/الطلاق ١٠ (٢٥)، مسند احمد (٦/٤٢، ١٧٠، ١٨٠، ١٨٦، ٢٠٩)، سنن الدارمی/الطلاق ١٥ (٢٣٣٦) (صحیح )
وضاحت: ١ ؎: جب بریرہ ؓ کے مالکوں نے ولاء (حق وراثت) لینا چاہا تو ام المؤمنین عائشہ ؓ نے نبی اکرم ﷺ سے ذکر کیا، آپ ﷺ نے فرمایا: اس کو خرید کر آزاد کر دو، ولاء (حق وراثت) اسی کو ملے گا جو آزاد کرے۔