کھیتوں میں پانی لے جانے کے سلسلے میں ایک تنازعہ اور آنحضرت کا فیصلہ
اور حضرت عروہ کہتے ہیں کہ ایک مرتبہ پہاڑی زمین سے کھیتوں میں پانی لے جانیوالی نالیوں کے سلسلے میں میرے والد حضرت زبیر اور ایک انصاری کے درمیان ایک تنازعہ اٹھ کھڑا ہوا ( جب وہ معاملہ بارگاہ رسالت میں پہنچا تو) نبی کریم ﷺ نے فرمایا کہ زبیر! (پہلے تم اپنے کھیتوں میں پانی لے جاؤ پھر اپنے ہمسایہ (یعنی اس انصاری) کے کھیتوں میں پانی چھوڑ دو (یہ فیصلہ سن کر) اس انصاری نے کہا کہ آپ ﷺ نے یہ فیصلہ اس لئے کیا ہے کہ زبیر آپ ﷺ کی پھوپھی کے بیٹے ہیں یہ سنتے ہی آنحضرت ﷺ کے چہرہ مبارک کا رنگ غصہ کی وجہ سے متغیر ہوگیا پھر آپ ﷺ نے فرمایا زبیر! اپنے کھیت میں پانی لے جاؤ اور پھر پانی کو روکے رکھو یعنی پانی کو اس انصاری کے کھیت میں نہ جانے دو تاکہ تمہارا پورا کھیت اچھی طرح سیراب ہوجائے اور پانی کھیت کی منڈیر تک پہنچ جائے۔ اس کے بعد نالی کا رخ اپنے ہمسایہ یعنی انصاری کے کھیت کی طرف کردو گویا آپ ﷺ نے اس صریح حکم کے ذریعے حضرت زبیر کو ان کا پورا حق دلوایا اس لئے کہ اس انصاری نے آپ ﷺ کو غضب آمیز کردیا تھا حالانکہ آنحضرت ﷺ نے ابتداء میں ان دونوں کے بارے میں جو فیصلہ صادر فرمایا تھا اس میں دونوں ہی کے لئے آسانی تھی (بخاری ومسلم)
تشریح
حضرت عروہ بن زبیر بن العوام جلیل القدر اور بڑے اونچے درجے کے تابعین میں سے ہیں، اس وقت مدینہ میں جو سات فقیہ تھے جن کا علم وفضل سب پر حاوی تھا ان میں سے ایک حضرت عروہ بھی ہیں ان کی والدہ محترمہ مشہور صحابیہ حضرت اسماء ہیں جو حضرت ابوبکر صدیق کی صاحبزادی ہیں اور ان کے والد حضرت زبیر مشہور صحابی اور آنحضرت ﷺ کی پھوپھی حضرت صفیہ بنت عبد المطلب کے صاحبزادے تھے۔ حضرت زبیر کی ایک خصوصیت یہ بھی ہے کہ یہ قدیم الاسلام ہیں یعنی آنحضرت ﷺ کی دعوت کے بالکل ابتدائی دور ہی میں مشرف باسلام ہوگئے تھے جب کہ ان کی عمر صرف سولہ سال کی تھی ایک طرف تو یہ ان کی سعادت تھی کہ انہوں نے اتنی چھوٹی سی عمر میں ہی اسلام قبول کرلیا تھا دوسری طرف ان کے ظالم چچا کی شقاوت تھی کہ اس نے ان کو اسلام لانے کے جرم میں طرح طرح کی سزا ور اذیتوں میں مبتلا کیا یہاں تک کہ وہ بدبخت ان کو راہ مستقیم سے ہٹانے کے لئے دھویں میں ڈال دیا کرتا تھا مگر یہ نوخیز جان ساری اذیتیں برداشت کرتی تمام مصیبتوں اور تکلیفوں کو برداشت کرتی مگر اسلام کی راہ میں جو قدم اٹھ چکا تھا وہ پیچھے ہٹنے کی بجائے آگے ہی بڑھتا رہا۔ انہوں نے نبی کریم ﷺ کے ہمراہ تمام غزوات جنگوں میں شرکت کی اور اسلام کا پرچم بلند کرنے کے لئے شجاعت وبہاردی کے جوہر دکھائے۔ رسول کریم ﷺ نے جن دس خوش نصیب صحابہ کو دنیا ہی میں جنت کی بشارت دے دی تھی اور جنہیں عشرہ مبشرہ کہا جاتا ہے ان میں سے ایک حضرت زبیر بھی ہیں۔ انہی حضرت زبیر کا واقعہ ہے کہ یہ اور ایک انصاری ایک ہی نالے کے ذریعے اپنے اپنے کھیتوں میں پانی لے جاتے تھے سوء اتفاق کہ ایک مرتبہ اسی نالی سے پانی لے جانے کے بارے میں ان دونوں میں یہ تنازعہ اٹھ کھڑا ہوا کہ وہ انصاری تو کہتا تھا کہ پہلے میں اپنے کھیت میں پانی لے جاؤں گا اور حضرت زبیر یہ کہتے تھے کہ پہلے میں اپنے کھیت کو سیراب کروں گا جب یہ بات زیادہ الجھ گئی اور وہ آپس میں کوئی تصفیہ نہ کرسکے تو اپنا معاملہ لے کر آنحضرت ﷺ کی خدمت میں حاضر ہوئے تاکہ آپ ﷺ کا فیصلہ حاصل کریں۔ موقع کی نوعیت یہ تھی کہ حضرت زبیر کی زمین بلندی پر بھی تھی اور نالی کے قریب بھی تھی جبکہ اس انصاری کی زمین نیچے تھی اور نالی سے دور تھی۔ قاعدہ کے مطابق پانی پہلے حضرت زبیر ہی کے کھیت میں جانا چاہئے تھا چناچہ آنحضرت ﷺ نے اس صورت حال کے پیش نظر یہ منصفانہ فیصلہ صادر فرمایا کہ پہلے زبیر اپنے کھیت میں پانی لے جائیں بعد میں ان کا ہمسایہ یعنی وہ انصاری اپنے کھیت میں پانی لے جائے۔ حق و صداقت کا صحیح شعور کھو دینے والے انسان کی جبلت یہ ہوتی ہے کہ جب وہ کسی معاملہ میں حق پر نہیں ہوتا اور اس کی وجہ سے فیصلہ اس کی خواہش کے برخلاف ہوتا ہے توہ بجائے اس کے کہ قبول کر کے انصاف کی برتری کو تسلیم کرلے کرتا یہ ہے کہ فیصلہ کرنے والے پر فیصلہ میں جانب داری کا الزام عائد کردیتا ہے چناچہ اس موقع پر بھی یہی ہوا کہ وہ انصاری چونکہ حق پر نہیں تھا اس لئے جب بارگاہ رسالت سے اس کی خواہش کے برخلاف فیصلہ صادر ہوا تو اس فیصلے کو برضا و تسلیم قبول کرنے کی بجائے اس نے یہ کہا کہ زبیر چونکہ آپ ﷺ کے پھوپھی زاد بھائی ہیں اس لئے یہ فیصلہ کیا ہے اسی طرح گویا آپ ﷺ پر جانب داری کا الزام عائد کیا ظاہر ہے کہ کسی منصف و عادل کے لئے ذہنی اذیت وکوفت کا اس سے بڑا اور کوئی سبب نہیں ہوسکتا کہ اس کے کسی منصفانہ فیصلے پر جانبداری اور عصبیت کا الزام عائد کردیا جائے۔ اسی لئے جب اس انصاری نے یہ بات کہی تو آنحضرت ﷺ کی جبیں پر بل پڑگئے اور غصے کے شدید ترین جذبات نے آپ ﷺ کے چہرہ مبارک کا رنگ متغیر کردیا۔ اس کا نتیجہ یہ ہوا کہ آپ ﷺ کے اس فیصلے نے جس میں تھوڑی بہت رعایت اس انصاری کی بھی تھی) اس صریح حکم کی صورت اختیار کرلی کہ زبیر! اب تم اپنا حق پورا پورا لو اور وہ یہ کہ نہ صرف پہلے تم اپنے کھیت میں پانی لے جاؤ بلکہ کھیت کو پوری طرح سیراب کرو اس میں اچھی طرح پانی دو جب تمہارا کھیت منڈیروں تک بھر جائے تب نالی کا رخ اس انصاری کے کھیت کی طرف کرو۔ چنانچہ رایت کے آخری جملوں کا مطلب یہی ہے کہ ابتداء میں آنحضرت ﷺ نے جو فیصلہ صادر فرمایا تھا اس میں حضرت زبیر کو یہ اشارہ بھی تھا کہ اپنا کچھ حق ازراہ احسان اپنے ہمسایہ کے لئے چھوڑ دو تاکہ تمہارا کام ہوجائے جو انصاف کا تقاضہ ہے اور اس انصاری کے ساتھ بھی کچھ رعایت ہوجائے جو اگرچہ تم پر واجب نہیں ہے مگر آپس کے معاملات میں بہتری و بھلائی پیدا کرنے کے نقطہ نظر سے مناسب ہے مگر جب اس انصاری نے اس فیصلے کو قبول نہیں کیا تو پھر آنحضرت ﷺ نے حضرت زبیر کو اپنا حق پورا پورا حاصل کرنے کا حکم دیا۔ اب رہی یہ بات کہ آنحضرت ﷺ کی شان میں اس انصاری کی اس گستاخی کا کیا سبب تھا؟ تو بعض حضرات یہ کہتے ہیں کہ وہ انصاری دراصل منافق تھا اور منافقوں کا یہ رویہ تھا کہ وہ آپ ﷺ کی گستاخی اور آپ ﷺ کو ذہنی اذیت وکوفت میں مبتلا کرنے کا کوئی موقع ہاتھ سے نہ جانے دیتے تھے۔ پھر یہ سوال پیدا ہوتا ہے کہ جب وہ منافق تھا تو اسے انصاری کیوں کہا گیا؟ اس کا جواب یہ ہے کہ اس کو انصاری اس مناسبت سے کہا گیا ہے کہ وہ انصار کے قبیلے سے تعلق رکھتا تھا چناچہ انصار کے قبیلوں میں بعض منافق بھی تھے مثلا عبداللہ ابن ابی وغیرہ۔ بات یہیں ختم نہیں ہوجاتی یہاں پہنچ کر ایک یہ نیا سوال سر ابھارتا ہے کہ جب وہ منافق تھا اور اس نے دشمن رسالت میں اتنی بڑی گستاخی کی تھی تو اسے سزا کیوں نہیں دی گئی اسے فورا قتل کردینا چاہئے تھا؟ اس سلسلے میں یہ کہا جاتا ہے کہ اسے سزاء قتل نہ کرنے کا سبب یا تو اس کی تالیف یعنی ازراہ الفت و رعایت اس کو راہ حق لگانا تھا یا یہ کہ آپ ﷺ کے اس صبر و تحمل نے اس کو قتل کرنا گوارا نہ کیا جو ہمیشہ ہی منافقوں کی ایذاء رسانیوں پر ظاہر ہوتا تھا پھر اگر اسے قتل کردیا جاتا تو مخالفین اسلام طعنہ کرتے کہ محمد ﷺ تو اپنے ہی ساتھیوں کو قتل کرتے ہیں کیونکہ منافق بہرحال ظاہر طور پر اپنے کو مسلمان کہتے تھے اور آپ ﷺ کا ساتھی ہونے کا اظہار کرتے تھے۔ بعض علماء کی تحقیق یہ ہے کہ وہ انصاری مؤمن ہی تھا مگر غصہ اور جھنجھلاہٹ نے اس کے دل و دماغ کو اس طرح ماؤف کردیا تھا کہ وہ اضطرارا آپ ﷺ کی شان میں یہ گستاخی کر بیٹھا۔ واللہ اعلم