مشکوٰۃ المصابیح - سیدالمرسلین کے فضائل ومناقب کا بیان - 5642
آنحضرت (صلی اللہ علیہ وآلہ وسلم) کے فضائل ومناقب اور آپ (صلی اللہ علیہ وآلہ وسلم) کی ذات ستودہ صفات کے اوصاف حمیدہ اور فضائل کبری کا کوئی شمار نہیں، کسی زبان وقلم کو تاب نہیں کہ آپ (صلی اللہ علیہ وآلہ وسلم) کے تمام فضائل اور اوصاف کا احاطہ کرسکے، تاہم مؤلف مشکوٰۃ نے ان میں سے کچھ فضائل کے متعلق احادیث و روایات کو اس باب کے تحت جمع کیا ہے۔ اس بات پر تمام علماء کا اتفاق ہے کہ آنحضرت (صلی اللہ علیہ وآلہ وسلم) تمام اولاد آدم کے سردار ہیں، انبیاء میں سب سے افضل و اشرف آپ (صلی اللہ علیہ وآلہ وسلم) ہی ہیں، آپ (صلی اللہ علیہ وآلہ وسلم) کے بعد حضرت ابراہیم خلیل اللہ (علیہ السلام) افضل ہیں، پھر حضرت موسیٰ کلیم اللہ (علیہ السلام) ۔ حضرت موسیٰ (علیہ السلام) کے بعد کس کا درجہ ہے اس بارے میں صراحت کے ساتھ علماء سے منقول نہیں ہے، ویسے بعض علماء نے حضرت موسیٰ (علیہ السلام) کے بعد حضرت عیسیٰ (علیہ السلام) کو اور ان کے بعد حضرت نوح (علیہ السلام) کو افضل و اشرف کہا ہے اور لکھا ہے کہ انبیاء (علیہ السلام) کی طویل فہرست میں یہ پانچ نبی اولو العزم سمجھے جاتے ہیں اور راہ حق میں ان کے صبر و استقامت اور عزیمیت کا درجہ بےمثال ہے۔
Top