عبداللہ بن عباس کی مرویات
محمد بن عمرو (رح) کہتے ہیں کہ ایک مرتبہ میں حضرت ابن عباس ؓ کی خدمت میں جمعہ کے اگلے دن حاضر ہوا، اس وقت وہ ام المومنین حضرت میمونہ ؓ کے گھر میں تھے کیونکہ حضرت میمونہ ؓ نے انہیں اس کی وصیت فرمائی تھی، حضرت ابن عباس ؓ جب جمعہ کی نماز پڑھ لیتے تو ان کے لئے وہاں گدا بچھا دیا جاتا تھا اور وہ لوگوں کے سوالات کا جواب دینے کے لئے وہاں آکر بیٹھ جاتے۔ چناچہ ایک آدمی نے حضرت ابن عباس ؓ سے آگ پر پکے ہوئے کھانے کے بعد وضو کا حکم دریافت کیا، میں سن رہا تھا، حضرت ابن عباس ؓ نے اپنا ہاتھ اپنی آنکھوں کی طرف اٹھایا، اس وقت وہ نابینا ہوچکے تھے اور فرمایا کہ میں نے اپنی دونوں آنکھوں سے دیکھا ہے کہ نبی ﷺ نے اپنے کسی حجرے میں نماز ظہر کے لئے وضو کیا، تھوڑی دیر بعد حضرت بلال ؓ نماز کے لئے بلانے آگئے، نبی ﷺ باہر آنے کے لئے اٹھے، ابھی اپنے حجرے کے دروازے پر کھڑے ہی تھے کہ کسی صحابی ؓ کی طرف سے بھیجا ہوا گوشت اور روٹی کا ہدیہ آپہنچا، نبی ﷺ اپنے ساتھیوں کو ساتھ لے کر حجرہ میں واپس چلے گئے اور ان کے سامنے وہ کھانا پیش کردیا، نبی ﷺ نے خود بھی تناول فرمایا اور صحابہ کرام ؓ نے بھی کھایا، پھر نبی ﷺ اپنے ساتھیوں کے ساتھ نماز پڑھنے کے لئے کھڑے ہوئے تو آپ ﷺ نے یا آپ کے کسی صحابی ؓ نے پانی کو چھوا تک نہیں اور نبی ﷺ نے اسی طرح نماز پڑھا دی۔ راوی کہتے ہیں کہ حضرت ابن عباس ؓ کو نبی ﷺ کے آخری معاملات یاد تھے اور وہ اس وقت سمجھدار ہوگئے تھے۔