حضرت ابوسعید خدری ؓ کی مرویات
نافع (رح) کہتے ہیں کہ ایک شخص حضرت ابن عمر ؓ کو حضرت ابوسعید خدری ؓ کے حوالے سے سونے چاندی کی خریدو فروخت کے متعلق حدیث سنا رہا تھا، حضرت ابن عمر ؓ نے میرا اور اس آدمی کا ہاتھ پکڑا اور ہم حضرت ابوسعید ؓ کے پاس پہنچ گئے، انہوں نے کھڑے ہو کر حضرت ابن عمر ؓ کا استقبال کیا، حضرت ابن عمر ؓ نے ان سے فرمایا کہ انہوں نے مجھے ایک حدیث سنائی ہے اور ان کے خیال کے مطابق وہ حدیث آپ نے انہیں نبی ﷺ کے حوالے سے سنائی ہے، کیا واقعی آپ نے یہ حدیث نبی ﷺ سے سنی ہے؟ انہوں نے فرمایا کہ میں نے اپنی آنکھوں سے دیکھا اور اپنے کانوں سے نبی ﷺ کو یہ فرماتے ہوئے سنا کہ سونا سونے کے بدلے اور چاندی چاندی کے بدلے برابر سرابر ہی بیچو، ایک دوسرے میں کمی بیشی نہ کرو اور ان میں سے کسی غائب کو حاضر کے بدلے میں مت بیچو۔