حضرت جابر انصاری کی مرویات۔
ایک مرتبہ حضرت جابر ؓ کا اونٹ بیٹھ گیا اور اس نے انہیں تھکا دیا نبی ﷺ کا وہاں سے گزر ہوا تو پوچھا جابر ؓ تمہیں کیا ہوا انہوں نے سارا ماجرا ذکر کیا نبی ﷺ اتر کر اونٹ کے پاس آئے اور فرمایا جابر ؓ اس پر سوار ہوجاؤ وہ کہنے لگے کہ یارسول اللہ! ﷺ یہ تو کھڑا ہی نہیں ہوسکتا نبی ﷺ نے پھر فرمایا کہ اس پر سوار ہوجاؤ چناچہ حضرت جابر ؓ اس پر سوار ہوگئے نبی ﷺ نے اس اونٹ کو اپنے پاؤں سے ٹھوکر ماری اور اونٹ اس طرح اچھل کر کھڑا ہوگیا کہ اگر حضرت جابر ؓ اس کے ساتھ نہ چمٹ گئے ہوتے تو گرجاتے نبی ﷺ نے فرمایا جابر ؓ اب تم اپنے گھر والوں کے پاس جاؤ تم دیکھو گے کہ انہوں نے تمہارے لئے فلاں فلاں چیز تیار کی ہے حتی کہ بستر کا تذکرہ فرمایا اور فرمایا کہ ایک بستر مرد کا ہوتا ہے اور ایک عورت کا ہوتا ہے ایک بستر مہمان کا ہوتا ہے اور چوتھا بستر شیطان کا ہوتا ہے۔