حضرت زبیربن عوام ؓ کی مرویات
حضرت زبیر ؓ بیان فرمایا کرتے تھے کہ ایک مرتبہ ان کا ایک انصاری صحابی ؓ سے جو غزوہ بدر کے شرکاء میں سے تھے نبی ﷺ کی موجودگی میں پانی کی اس نالی میں اختلاف رائے ہوگیا جس سے وہ دونوں اپنے کھیت کو سیراب کرتے تھے، نبی ﷺ نے بات کو ختم کرتے ہوئے فرمایا زبیر! تم اپنے کھیت کو سیراب کر کے اپنے پڑوسی کے لئے پانی چھوڑ دو، انصاری کو اس پر ناگواری ہوئی اور وہ کہنے لگے کہ یا رسول اللہ! یہ آپ کے پھوپھی زاد ہیں ناں اس لئے آپ یہ فیصلہ فرما رہے ہیں؟ اس پر نبی ﷺ کے روئے انور کا رنگ بدل گیا اور آپ ﷺ نے حضرت زبیر ؓ سے فرمایا کہ اب تم اپنے کھیت کو سیراب کرو اور جب تک پانی منڈیر تک نہ پہنچ جائے اس وقت تک پانی کو روکے رکھو، گویا اب نبی ﷺ نے حضرت زبیر ؓ کو ان کا پورا حق دلوا دیا، جبکہ اس سے پہلے نبی ﷺ نے حضرت زبیر ؓ کو ایسا مشورہ دیا تھا جس میں ان کے لئے اور انصاری کے لئے گنجائش اور وسعت کا پہلو تھا، لیکن جب انصاری نے نبی ﷺ کے سامنے اپنے تحفظات کا اظہار کیا تو نبی ﷺ نے صریح حکم کے ساتھ حضرت زبیر ؓ کو ان کا پورا حق دلوایا۔ حضرت زبیر ؓ فرماتے ہیں بخدا! میں یہ سمجھتا ہوں کہ مندرجہ ذیل آیت اسی واقعے سے متعلق نازل ہوئی ہے کہ آپ کے رب کی قسم! یہ اس وقت تک کامل مومن نہیں ہوسکتے جب تک کہ آپس کے اختلافات میں آپ کو ثالث مقرر نہ کرلیں، پھر اس فیصلے کے متعلق اپنے دل میں کسی قسم کی تنگی محسوس نہ کریں اور اسے مکمل طور پر تسلیم نہ کریں۔