Urwatul-Wusqaa - 18 : 15

هٰۤؤُلَآءِ قَوْمُنَا اتَّخَذُوْا مِنْ دُوْنِهٖۤ اٰلِهَةً١ؕ لَوْ لَا یَاْتُوْنَ عَلَیْهِمْ بِسُلْطٰنٍۭ بَیِّنٍ١ؕ فَمَنْ اَظْلَمُ مِمَّنِ افْتَرٰى عَلَى اللّٰهِ كَذِبًاؕ

هٰٓؤُلَآءِ : یہ ہے قَوْمُنَا : ہماری قوم اتَّخَذُوْا : انہوں نے بنا لیے مِنْ دُوْنِهٖٓ : اس کے سوا اٰلِهَةً : اور معبود لَوْ : کیوں لَا يَاْتُوْنَ : وہ نہیں لاتے عَلَيْهِمْ : ان پر بِسُلْطٰنٍ : کوئی دلیل بَيِّنٍ : واضح فَمَنْ : پس کون اَظْلَمُ : بڑا ظالم مِمَّنِ : اس سے جو افْتَرٰى : افترا کرے عَلَي : پر اللّٰهِ : اللہ كَذِبًا : جھوٹ

یہ ہماری قوم کے لوگ ہیں جو اللہ کے سوا دوسرے معبودوں کو پکڑے بیٹھے ہیں وہ اگر معبود ہیں تو ان کے لیے کوئی روشن دلیل پیش کریں ؟ پھر اس سے بڑھ کر ظالم کون ہے جو اللہ پر جھوٹ کہہ کر بہتان باندھے ؟

انہوں نے قوم سے کہا تم نے جو معبود بنا رکھے ہیں آخر تمہارے پاس اس کی دلیل کیا ہے ؟ : 15۔ انہوں نے آپس میں بھی بیٹھ کر سیر حاصل بحث کی کہ آج کل جو کچھ ہماری قوم کر رہی ہے یہ زندہ قوموں کا شیوہ نہیں اور قوم کو بھی مخاطب کرکے کہا کہ ” یہ جو تم نے اللہ کے سوا دوسروں کو پکڑ رکھا ہے تو آخر تمہارے پاس اس کی دلیل کیا ہے ؟ ذرا اپنی وہ دلیل تو بیان کرو اگر تمہارے پاس کوئی دلیل نہیں تو تم ہی بتاؤ کہ اس شخص سے زیادہ ظالم کون ہوگا جو اللہ پر جھوٹ باندھے اور اللہ کے ذمہ وہ باتیں لگا دے جو اس میں نہیں ہیں اور جس سے اللہ اللہ نہ رہے بلکہ وہ خود مخلوق تصور ہونے لگے تم ہی بتاؤ کہ یہ اللہ پر بہتان نہیں تو اور کیا ہے ؟ قوم کے پاس اور ظالم حکمرانوں کے پاس جواب تو تھا نہیں لیکن طاقت وزور ضرور تھا اور یہی وجہ ہے کہ انہوں نے آخر میں زور دکھایا اور حکومت وقت کو ان کی حالت سے آگاہ کیا ، حکومت نے ان کو طلب کیا اور ان کے عقائد پر ان کی سرزنش کی اور قومی عقائد اختیار کرلینے کی ہدایت کر کے معاملہ غور طلب قرار دے دیا اور اس کے لئے انکو ایک تاریخ مقرر کردی کہ ان دنوں میں آپ لوگ اچھی طرح سوچ سمجھ لیں کل تم کو یہ اعتراض نہ رہے کہ ہم نے تم کو سوچنے کا موقع ہی فراہم نہ کیا ، لیکن اب اگر تم باز نہ آئے تو تمہارا انجام بخیر نہیں ہوگا ۔

Top